Almatydaǵy «Bóbek» ulttyq ortalyǵynda Naýryz meıramy toılandy. Bul sharaǵa Qazaqstan Respýblıkasynyń Birinshi hanymy Sara Nazarbaeva, Bilim jáne ǵylym vıse-mınıstri Bıbigúl Asylova, atalǵan mınıstrliktiń Balalar quqyǵyn qorǵaý komıtetiniń tóraǵasy Nurbek Orshýbekov qatysty.
Áz-Naýryzda kún men tún teńeledi. Tabıǵat pen Jer-Ana qulpyrady. Jan-janýarlar túleıdi. Tal-terekter búrshik jarady. Qazaqtyń saıyn dalasyn Qyzyr baba kezip, adam balasyna qut-bereke, baq-dáýlet syılaıdy. Qasıetti qara jer, qara topyraq býsanady. Uly dalanyń tósinde qyzǵaldaqtar qulpyra ósip, bel-belesterge qyzyldy-jasyldy kilem tóseledi. Ulan-baıtaq Qazaqstannyń halqy jeti túrli dámnen naýryzkóje jasap, ulttyq salt-dástúr, ádet-ǵuryptardy saqtap, aı boıy Ulystyń uly kúnin toılaıdy.
«Bóbek» ortalyǵynda ótken merekelik is-sharanyń taqyryptyq ıdeıasy – «Rýhanı jańǵyrý: máńgilikke bastar jol». Kóktemgi meıramnyń jarqyn dástúrleri osy shara barysynda rýhanı-adamgershilik qundylyqtar aspektinde kórsetildi. Osy merekege qatysqan balalar úıiniń tárbıelenýshileri, gımnazııa men kolledj shákirtteri, «Bóbek» ortalyǵynyń qyzmetkerleri jáne basqa da meımandarǵa quttyqtaý sózderin arnaǵan Sara Nazarbaeva men Bıbigúl Asylova Naýryz meıramynyń máni men mańyzyna erekshe toqtaldy.
Ortalyqtyń at shaptyrym aýmaǵynda kıiz úıler tigilip, mol dastarqan jaıyldy. Sharaǵa qatysýshylardyń barlyǵy da naýryzkójeden dám tatyp, Shyǵys halyqtarynyń basty meıramy sanalatyn – Ulystyń uly kúni týrasynda tartymdy áńgimeniń tıegin aǵytty. Odan keıin merekelik baǵdarlama gala-konsertke ulasty. Jınalǵan qaýym «Bóbek» ortalyǵy ónerpazdarynyń oryndaýyndaǵy san alýan kórnisterdi tamashalady. Halyq ánderi shyrqaldy. Teatrlandyrylǵan kórinister qoıyldy. Keremet kúıler oryndaldy. Keń-baıtaq, qonaqjaı Qazaq elinde turyp jatqan ózge de halyqtardyń ulttyq bıleri bılenip, tarıhı-mádenı kompozısııalar qoıyldy.
Ǵalym SÚLEIMEN,
«Egemen Qazaqstan»
ALMATY