Almatydaǵy Qazaqstannyń Ábilhan Qasteev atyndaǵy memlekettik óner mýzeıinde belgili qoǵam qaıratkeri, eńbegi sińgen óner qaıratkeri jáne Qazaqstannyń dızaınerler Odaǵynyń prezıdenti Tımýr Súleımenovpen qoshtasý rásimi ótti, - dep habarlaıdy Almaty ákimdiginiń baspasóz qyzmeti.
Qazaqstan Respýblıkasynyń Prezıdenti Nursultan Nazarbaevtyń kóńil aıtý jedelhatyn Almaty ákimi Baýyrjan Baıbek oqyp berdi. Memleket basshysy belgili qoǵam qaıratkeri Tımýr Súleımenovtyń qaıtys bolǵany jónindegi habardy qatty qaıǵyryp qabyldaǵan.
"Tımýr Bımashuly óz mamandyǵynyń has sheberi edi. Ol arhıtektor jáne dızaıner retinde kemel bilimi men mol tájirıbesin týǵan eliniń ıgiligine arnap eńbek etti. Qazaqstanda osy óner túrleriniń damýyna laıyqty úlesin qosyp, birqatar mańyzdy jobalardyń iske asýynda óz qoltańbasyn qaldyrdy. Elimizde alǵash ret Dızaınerler odaǵyn quryp, kóp jyl boıy sonyń jumysyna jetekshilik jasady. Kezinde respýblıka Joǵarǵy Keńesiniń depýtaty bolyp saılanyp, zań shyǵarý qyzmetiniń damýyna da úlesin qosty. Aıaýly azamattyń eńbegi men dıdary halqymyzdyń jadynda árdaıym saqtalady dep oılaımyn", - delingen jedelhatta.
Búgingi kúni onyń ózindik qoltańbasyn elimizdiń ár óńirinen kórýge bolady. Olardyń arasynda Astanadaǵy saıası repressııa qurbandaryna arnalǵan Memorıaldy keshen, "Atameken" etno-memorıaldy parki, Ańyraqaı shaıqasyndaǵy tarıhı eskertkishter, Almaty oblysyndaǵy "Cherkassk qorǵanynyń batyrlary" memorıaldy kesheni bar. Tımýr Súleımenov Máskeýdegi Abaı eskertkishi men Almatydaǵy "Táýelsizdik tańy" monýmentin jasaýǵa da qatysqan edi.