Qart abyzdaı qýat kúshi sarqylǵan shaǵyńda qasyńda ázız anań jadyrap otyrsa baqyt degen sol emes pe! Osyndaı jandardyń biregeıi – Almaty oblysy, Raıymbek aýdany, Shálkóde aýylynyń turǵyndary jasy 113-ke kelgen Turaqan ájeı men toqsanǵa taıaǵan balasy Dámethan qarııa dep oılaımyz.
Jalǵannyń jaıly tórinde turaqtap qalǵan eshkim joq. Dese de ul-qyzynyń shattyǵyna bólenip, nemeresin jetektep, shóberesine elpektep urpaǵynyń qyzyq qýanyshyn uzaǵynan kórýdi kim qalamasyn. Halqymyz kóp jasaǵan jandy «súıegi asyl eken», «jaratqannyń nazary túsken pendesi eken» dep jatady. Keıingige ulaǵatyn aıtyp, ádemi qartaıý árbir adam balasynyń armany.
Japyraǵyn keńge jaıǵan máýeli báıterekteı abyz ana ózin dúnıedegi eń baqytty jan dep esepteıdi. Myna sýrette ájeıdiń qasynda otyrǵan tula boıy tuńǵyshy Dámethan qarııa. Bylaıǵy jurtqa aq saqaldy abyzdaı bolǵanymen, Turaqan áje úshin áli kúnge bala. Jasy toqsanǵa taıaǵan ol kóńildiń keıbir sátterinde anasyn maýqyn basa qushaqtap, erkelep alatyn kórinedi. Shesheli-balaly qarııalarǵa súısine qarap otyryp «Anasy bar adamdar, eshqashan qartaımaıdy» degen án joldary dáp osy Dámethan qarııaǵa arnalyp aı-tylǵan ba dersiń.
On alty qursaq kótergen batyr ana taǵdyr jolynda bar men joqty tel emdi. Qatal turmystyń qaqaǵan aıazyn da, araıly kúnderdiń shattyq pen shýaǵyn da kórdi. Otbasy jaǵdaıyna baılanysty oqı almaǵan ol zamanynda jylqy men qoı baǵypty. Naýbaıhanada nan pisirip, tylda tynymsyz eńbek etipti. Qıyn kúnderdiń bári de kórgen tústeı artta qaldy degen áje seksenge tarta nemere-shóbereniń ortasynda otyrǵanda rahatty jan-tánimen sezinip, kózine qýanyshtan jas alatynyn aıtady. Nemere men shóberelerdiń toı-dýmandarynda tórde otyryp tilegin jetkizetin Turaqan ájeni tutas aýyl qurmetteıdi. Alystan kelgen qonaqtar aldyna arnaıy kelip yrymdap batasyn alatyn kórinedi. Amandasa barǵanymyzda «Jeńis merekesiniń qarsańynda «Nur Otan» partııasy Tóraǵasynyń birinshi orynbasary Máýlen Áshimbaevtyń ózi quttyqtaý hatyn jiberipti, minekı» dep aǵynan jarylyp qýanyp otyr. Ájeımen áńgimelesip otyryp shynynda da súıegi asyl jan ǵoı dep tańyrqaısyń. Uzaq ǵumyr bergen Qudaı Taǵala keıýanany tilden de jańyldyrmaǵan. О́tken kúnderiniń esteligin shejiredeı shertedi.
Adamdy adam qylatyn mańdaı ter men adal eńbek. Qandaı qıyndyq kelse de ýaıymǵa berilmeý kerek. О́mirdiń qýanyshyn da qıynshylyǵyn da elmen birge kórdik. Áıteýir, ólgen joqpyz. Kóptiń tileýi jaqsy bolady. Yntymaq bar jerde, yrys bar. Biz kórgen qıynshylyqtardy urpaǵymyz kórmese eken. Zamanyń beıbit bolsa – jumaq degen sol. Halqymyz, elimiz aman bolsyn» – deıdi Turaqan Ábdibaeva.
Kóp jasaǵan kisini kórsek munyń bir qupııasy bar shyǵar, surap bileıik dep yntamyz aýyp turatyny anyq. Osy dástúrden jańylmaı ájeıden kóp jasaýyńyzdyń syry nede dep suraǵanymyzda: «jaıly adamnyń aýzynda ádemi ázili bolady, kóńildi júrińder jáne eńbek etińder» degendi estidik.
О́ziń bir aýyl-eldiń aqsaqaly bolyp otyrǵanyńda janyńda aqylgóı anań bolǵany qandaı jarasymdy.
Ana men bala... Baqyt degen osy shyǵar.
Arman OKTIаBR,
«Egemen Qazaqstan»
ALMATY
Sýretti túsirgen
Rasýl SÁLIMULY