Qasıetti Semeı jeri uly Abaıdyń eli, Alashtyń rýhanı astanasy. Qaladaǵy Mádenıet saraıynda ótken «Alashtyń nar jigiti» atty er azamattar arasyndaǵy saıys Shákárim Qudaıberdiulynyń 160 jyldyǵyna, Otan qorǵaýshylar kúni men Jeńistiń 73 jyldyǵyna arnaldy. Saıysta 18 jastan 40 jas aralyǵyndaǵy segiz azamat ózderiniń «Segiz qyrly, bir syrly» jigit ekendikterin dáleldep, synǵa tústi.
Olardyń ishinde atap aıtsaq, «Aqshyń» saýda ortalyǵynyń atqarýshy dırektory Erlan Jaqypov, Artıllerııalyq dıvızııanyń áskerı qyzmetshisi Ermek Teńizbaev, №42 orta mekteptiń muǵalimi Aman Qonysbekov, R. Baıseıitov atyndaǵy qarjy-ekonomıkalyq kolledjiniń ustazy Samat Káripjanov, «Nurdáýlet» balalar baqshasynyń tárbıeshisi Ernur Aqparov, Semeıdegi oblystyq tarıhı-ólketaný mýzeıiniń ekskýrsovod jetekshisi Mıras Qusaıynov, Shaqaman aýyldyq okgrýginiń bas mamany Danııar aıdarbaev, Abaıdyń memlekettik qoryq mýzeıiniń ǵylymı qyzmetkeri Meıirjan Nurlanovtar bar.
-Biz mine, baıqap otyrsańyzdar, saıysqa túrli mamandyqta myqty qyzmet istep júrgen saıdyń tasyndaı ór jigitterimizdi shaqyryp otyrmyz,-dedi Semeı qalalyq mádenıet jáne tilderdi damytý bóliminiń basshysy Nazerke Aqqojına,-Alashtyń izbasarlary tek ózderiniń ǵana mamandyqtary emes, basqa da talanttary bar ekendikterin halyq aldynda kórsete bilip, keler urpaqqa úlgi-ónege bolsyn degen maqsatty ustanyp otyrmyz.
Semeılik nar jigitter sonymen óleńmen ózin tanystyrýdan synǵa tústi. Sol kezden bastap Erlan Jaqypov aldyǵa oza shabatyndyǵyn birden kórsetti. Keń dala daýysy, sahnada ózin ózi ustaý mádenıeti erekshelenip, ózimen birge saıysqa qatysyp otyrǵandardan birden alǵa shyqty. Jeti qazynanyń birine jatatyn er qarýyn qoldanýda da taǵy da Erlan Jaqypovty atap ótpeske bolmaıdy eken, desti biraýyzdan ádilqazylar alqasy. Eń mergen retinde tanylǵan Erlan Jaqypov birden 44 upaı jınady. Odan keıin 41 upaıdy Meıirjan Nurlanov, 38 upaıdy Samat Karıbjanov enshiledi.
Ulttyq kıim kıip shyqqan kezde de saıysqa qatysýshylardyń talǵamy keńinen baǵalandy. Gır tasyn kóterý, án salyp, ulttyq naqyshta bı bıleý, salt-dástúrlerdi, tarıhty jatqa aıtyp berip, túsindirýden «Alashtyń nar jigiti» bas báıgesin Erlan Jaqypov ıelenip, beline jeńistiń belbeýin taqty.. Erlan Jaqypovpen birge qýanyp, quttyqtaǵan Alash eli onyń bolashaǵyna taǵy da zor jetistikterge, tabystarǵa jete berýin tiledi.
Raýshan NUǴMANBEKOVA
SEMEI