Búgin 17 mamyrda tańerteń óńirdegi Baıanaýyl, Maı, Sharbaqty, Lebıaji aýdandarynda qar túsken. Bul jaıynda aýyl turǵyndary habarlasyp, erekesh tabıǵat qubylysy bolar, mamyrda qar jaýǵandy buryn-sońdy kórmegen edik deıdi.
Ákim-qaralar oblys ortalyǵynda Naýryz meıramyn sáýirde ótkizemiz dep buıryq berip, qudiretin burmalaǵany úshin jaratylysty qatty renjitip te alǵan shyǵarmyz. Kóktem óńirge kelmeı tur.
Jergilikti aýa raıyn baqylaý ortalyǵynyń habaryna qaraǵanda salqyn aýa raıy óńirde mamyr aıynyń sońyna deıin saqtalady. Aldaǵy 20-na qaraı, 19 mamyr kún aýa temperatýrasy mınýs bes gradýsqa tómendeıdi. Qar, jańbyr qaıta jaýýy da múmkin. Kún maýsym aıynda ǵana jylynady.
Farıda Byqaı,
«Egemen Qazaqstan»
Pavlodar