Parlament Senatynda Qazaqstan Respýblıkasy Prezıdentiniń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýy aıasynda «Nurly jer» turǵyn úı qurylysy baǵdarlamasyn iske asyrý barysy týraly» taqyrybyna arnalǵan dóńgelek ústel otyrysy boldy, dep habarlady Parlament Senatynyń Baspasóz qyzmeti.
Senattyń Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Asqar Beısenbaev sharany asha kelip, «Nurly jer» baǵdarlamasy Memleket basshysy N.Á.Nazarbaevtyń tapsyrmasyn júzege asyrý úshin ázirlengenin atap ótti. Baǵdarlama iske qosylǵan bir jyl ishinde 11,2 mıllıon sharshy metr rekordty turǵyn úı salyndy.
Senator baǵdarlamany iske asyrýǵa teris áser etetin ózekti máselelerge toqtaldy. Atap aıtqanda, A. Beısenbaev turǵyndardyń áleýmettik álsiz toptaryna satyp alý quqyǵy joq jalǵa beriletin turǵyn úıler qurylysyna bólinetin qarjynyń jetispeýshiligin, jergilikti atqarýshy organdardyń nysandardy ýaqytynda paıdalanýǵa bermeýin, ekinshi deńgeıdegi bankterdiń kelisý rásimderi men basqa da bıýrokrattyq rásimderdiń kúrdeli ekenindigin aıtty. Senat komıtetiniń tóraǵasy odan basqa Prezıdenttiń bes áleýmettik bastamasyndaǵy «7-20-25» baǵdarlamasy aıasynda ázirlengen «Nurly jer» baǵdarlamasyna engiziletin ózgeristerge de toqtaldy. A. Beısenbaevtyń aıtýynsha, ýákiletti memlekettik organdar ózgeristerdi naqty pysyqtap, ózekti máselelerdi ýaqytynda sheshýi tıis.
Investısııalar jáne damý mınıstriniń orynbasary Qaıyrbek О́skenbaev «Nurly jer» baǵdarlamasyn 2017 jyly jáne 2018 jyldyń alǵashqy toqsanynda iske asyrýdyń negizgi kórsetkishterge toqtaldy jáne baǵdarlamanyń jańa Tujyrymdamasyn tanystyrdy. О́tken jyly 100 myńnan astam otbasy, onyń ishinde 25,2 myń otbasy memleket qarjysy esebinen ózderiniń turǵyn úı jaǵdaıyn jaqsartty. Bul salaǵa ınvestısııa 2017 jyly 18 paıyzǵa ulǵaıdy jáne 980 mıllıard teńgeni qurady.
Ulttyq banki tóraǵasynyń orynbasary Oleg Smolıakov «7-20-25» baǵdarlamasynyń jumys tetikteri jáne baǵdarlama aıasynda qaryz berýdiń sharttary týraly depýtattardy habardar etti. Onyń sózinde aıtylǵandaı, qaryz eńbek jáne kásipkerlik qyzmetten resmı túsetin kirisi bar jáne turǵyn úıi joq azamattarǵa beriledi.
Senat depýtaty Mıhaıl Bortnık zańnamany jetildirý, onyń ishinde halyqtyń turǵyn úı qurylysy jınaǵyna tólem talaptaryn kórsetýdi retteýge qatysty máselelerge toqtaldy. Senator satyp alý quqyǵy joq turǵyn úılerdiń jalǵa berý tetikterin iske asyrý jáne turǵyn úıge satyp alý quqyǵyn qaıtarý múmkindigi máselelerin kóterdi. M. Bortnık sondaı-aq baǵdarlama aıasynda aýyldyq eldi mekenderdegi, eń aldymen qala mańy kentterindegi turǵyn úı qurylysyna budan da qarqyn berýge shaqyrdy.
Dóńgelek ústel otyrysy barysynda «Báıterek» ulttyq basqarý holdıngi» AQ, «Shar-Qurylys» JShS, «Qazaqstan turǵyn úı qurylysy jınaq banki» AQ jáne «SentrKredıtBanki» AQ basshylary sóz sóıledi.
Sharaǵa qatysýshylar «Nurly jer» baǵdarlamasyn budan da tıimdi iske asyrýǵa kedergi bolyp otyrǵan ózekti máselelerdi sheshý jóninde pikir almasty. Halyqtyń áleýmettik álsiz toptary turǵyn úı qurylysyn salýǵa qarjylandyrý kólemin arttyrý jáne ınjenerlik kommýnıkasııany júrgizý týraly usynystar aıtyldy. Senatorlar sondaı-aq nysandardy ýaqytynan kesh paıdalanýǵa berýge jáne qurylysty salý kestesinen keıin qalýǵa jol bermeý úshin sharalar qabyldaýdy talap etti.
Dóńgelek ústeldiń qorytyndysy boıynsha usynystar ázirlendi jáne ol Úkimetke, jergilikti atqarýshy organdar men basqa da múddeli uıymdarǵa jiberiletin boldy, sondaı-aq zań shyǵarý jumystary barysynda Senat depýtattarynyń eskeretini aıtyldy.