Elordadaǵy Ulttyq mýzeıde Mádenıet jáne sport mınıstrliginiń qoldaýymen Halyqaralyq mýzeıler kúni merekesine oraı jańadan qurylǵan «Qazaqstan tulǵalyq mýzeıler qaýymdastyǵy» qoǵamdyq birlestiginiń saltanatty ashylýymen qatar, elimizde tuńǵysh ret úsh tilde jaryq kórgen «Qazaqstan mýzeıleri» atty anyqtamalyqtyń tusaýkeser rásimi ótti.
Is-sharaǵa Mádenıet jáne sport mınıstrligi Mádenıet jáne óner isteri departamentiniń dırektory Ábil Jolamanov jáne óńirlerdegi mádenıet basqarmalarynyń basshylary, respýblıkalyq mártebege ıe mýzeı-úılerdiń dırektorlary men jetekshi qyzmetkerleri kelip qatysty.
Saltanatty sharany ashqan departament dırektory Ábil Jolamanov: «Mýzeı – ulttyq ǵylym men mádenıettiń qory jınaqtalǵan mekeme. Elimiz táýelsizdik alǵaly jańadan 75 mýzeı ashylypty. Qazirgi tańda ol halqymyzdyń tarıhy men etnografııasyn nasıhattaıtyn birden-bir orynǵa aınalyp otyr. Bunyń barlyǵy memleket tarapynan mádenıet-rýhanııat salasyna qoldaý bildirilip kele jatqandyǵynyń aıǵaǵy» dedi.
О́z kezeginde sóz alǵan Ulttyq mýzeı dırektorynyń mindetin atqarýshy Leonıd Kochetov, mádenı muralardy saqtap, ony nasıhattaýǵa, jastardyń tarıhı sanasyn jańǵyrtý isinde mýzeıdiń alatyn orny erekshe ekenin aıta otyryp, búgingi tańda bul mekemeniń basty mindeti – halyqty óziniń tarıhy, óner-mádenıetimen jiti tanystyryp, keler urpaqty ulttyq qundylyqtardy qasterleýge úıretý, – dep sózin túıindedi.
Sondaı-aq Elbasy N.Á.Nazarbaevtyń «Sıfrly Qazaqstan» baǵdarlamasynyń aıasynda jaryq kórip, atalmysh shara barysynda tusaýy kesilgen «Qazaqstan mýzeıleri» anyqtamalyǵy elimizdiń barlyq mádenı mekemesi men uıymdary jáne jeke tulǵalarǵa arnalǵan qundy eńbek desek jarasady. Bul eńbekke respýblıka aýmaǵynda ornalasqan 238 mýzeı jaıly elektrondy karta engizilip, ol 3D formatynda jasalypty. Osy arqyly saıahatshy-týrısterdiń elimizdegi mýzeıler týraly tolyq aqparat alýǵa múmkindigi bar.
Beken QAIRATULY, «Egemen Qazaqstan»