Memlekettik hatshy Gúlshara Ábdiqalyqova Qazaqstan Respýblıkasy Prezıdentiniń janyndaǵy Memlekettik basqarý akademııasy Memlekettik saıasattyń ulttyq mektebiniń úzdik tyńdaýshylarymen kezdesti.
Ulttyq mektep Elbasynyń tapsyrmasymen 2008 jyly ashyldy. Osy jyldar ishinde ol jańa turpattaǵy 140 memlekettik basqarý isiniń qyzmetkerlerin daıarlap shyǵardy.
2016 jyly Memlekettik basqarý akademııasynda oqý isiniń túbegeıli transformasııasy bastaldy. Nazarbaev ýnıversıteti men Lı Kýan Iý memlekettik saıasat mektebiniń qoldaýymen magıstrlyq baǵdarlamalar jańartyldy. «Sıfrly Akademııa» jobasy ázirlenýde.
G.Ábdiqalyqova óziniń quttyqtaý sózinde qazir elimizde Ult jospary iske asyrylyp jatqanyna, onda kásibı memlekettik apparat qalyptastyrý alǵashqy baǵyt retinde belgilengenine toqtaldy.
Memlekettik hatshy Qazaqstan Prezıdentiniń úzdik memlekettik qyzmetshilermen byltyrǵy kezdesýinde: «Básekege qabiletti memlekettik qyzmet qalyptastyrmaı, basty maqsatymyz – ósip-órkendegen Qazaqstandy qurýǵa qol jetkizý múmkin emes», – degenin atap ótti.
– Búginde dúnıe júzinde sıfrlandyrý dáýiri bastaldy. Ol, eń aldymen, memlekettik apparatty udaıy jańǵyrtyp otyrýdy talap etedi. Bul rette memlekettik basqarýdyń tıimdi modelin qamtamasyz etýdiń ońtaıly tetiginiń biri – memlekettik qyzmetshilerdi oqytý isinde jańa úrdister men tehnologııalardy eskere otyryp, úzdiksiz bilim berý, – dedi Memlekettik hatshy.
Gúlshara Ábdiqalyqova jahandyq bilim berý keńistiginde damyp kele jatqan mynadaı trendterdi atap ótti: buqaralandyrý, kommersııalandyrý, ınternasıonaldandyrý, aqparattandyrý jáne sıfrlandyrý. Olar ınnovasııalyq bilimdi ıgerip, sheberlik pen mashyqqa ıe bolýdy talap etedi. 2016 jyly Davostaǵy Dúnıejúzilik ekonomıkalyq forýmda 2020 jylǵa qaraı ózekti bola túsetin 10 kásibı mashyq ataldy: synı turǵydan oılaý, kreatıvtilik, problemalardy sheshý mashyǵy, emosıonaldyq ıntellekt jáne t.b.
– Ol úshin bizge úzdiksiz bilim alý kýltin qalyptastyrý qajet. Atap aıtqanda, óz bilimiń men qabiletińdi jetildirip, óz-ózińdi damytý arqyly ómir boıy bilim alý kerek, – dedi G.Ábdiqalyqova.
Kezdesý sońynda Memlekettik hatshy Gúlshara Ábdiqalyqova Memlekettik saıasattyń ulttyq mektebi tyńdaýshylaryna jańa bilimderin, iskerlik qasıetteri men mashyqtaryn memlekettik qyzmette Qazaqstan halqynyń ıgiligi úshin jumsaýǵa tilektestik bildirdi.