Búgin Qostanaı oblysyna jumys sapary aıasynda QR Premer-Mınıstri Baqytjan Saǵyntaev Rýdnyı qalasynda «Jas Qanat – 2006» JShS-de boldy, onda «Sıfrlyq Qazaqstan» memlekettik baǵdarlamasy aıasynda iske asyrylyp jatqan «Aqyldy qus fabrıkasy» pılottyq jobasynyń jumysymen tanysty, dep habarlaıdy primeminister.kz.
Kásiporyndy aralaý kezinde «Jas Qanat – 2006» JShS dırektory Qaırat Maıshev «Bıznestiń jol kartasy – 2020» aıasynda júrgizilip jatqan jańǵyrtý sharalary týraly aıtyp berdi. Jalpy, kásiporyn jańǵyrtýdyń úsh kezeńinen ótti, barlyq qajetti ınfraqurylym quryldy, eń joǵary tehnologııalyq jabdyqtar satyp alyndy. Investısııalar kólemi 3 mlrd teńgeden asady.
Prosesterdi avtomattandyrý jumyrtqa óndirisin jylyna 7 mln-nan 250 mln danaǵa, ıaǵnı shamamen 35 esege deıin ulǵaıtýǵa, et óndirisin 30 tonnadan 500 tonnaǵa deıin nemese 15 esege ulǵaıtýǵa múmkindik berdi. Qustardyń orny 100 myńnan 1,4 mln-ǵa deıin nemese 14 esege artty. Eńbek ónimdiligi 1,5 eseden astamǵa ósti.
B. Saǵyntaevqa suryptaý sehynda qýattylyǵy saǵatyna 120 myń jumyrtqany quraıtyn japondyq «Nabel» jabdyǵy tanystyryldy. Jańa tehnologııalar ónimderdi qolmen tańbalaý men suryptaýdan bosatýǵa múmkindik berdi. Budan ózge, kásiporynda jumyrtqa salatyn qoraptar shyǵarý jelisi iske qosyldy. О́ndiristi avtomattandyrý kúnine segiz saǵattyq jumys kúninde mıllıonǵa jýyq jumyrtqany tasymaldaýǵa jáne qaptaýǵa múmkindik beredi.
О́ndiriletin ónim elimizdiń barlyq óńirlerinde satylyp, Reseıge, Aýǵanstanǵa, Tájikstanǵa jáne Qyrǵyzstanǵa eksporttalady. Bıyl ónimdi Iran men Qytaıdyń jańa naryqtaryna eksporttaý bastaldy.
Sonymen qatar, aldaǵy úsh jylda sıfrlyq tehnologııalarǵa 2 mlrd teńgege jýyq ınvestısııa salý josparlanyp otyr. ERP (Enterprise Resource Planning) júıesin engizý tehnologııalyq prosesterdiń sapasyn jaqsartýǵa jáne óndiristik máselelerdi jedel sheshýge, sonyń ishinde qashyqtan sheshýge jol ashady. Budan ózge, odan ári jańǵyrtý aıasynda jumyrtqany, et jáne basqa da ónimderdi tereń óńdeýge arnalǵan avtomattandyrylǵan jelini iske qosý múmkindigi qarastyrylýda.
Sondaı-aq, 2019–2021 jyldarǵa ımport almastyrýdy damytý maqsatynda álemniń jetekshi óndirýshileriniń tolyq avtomattandyrylǵan jabdyǵymen jabdyqtalǵan asyl tuqymdy reprodýktor qurylysy josparlanǵan. Atalǵan jobany iske asyrý ımportty 40% tómendetýge múmkindik beredi.