Ortalyq kommýnıkasııalar qyzmetinde Astana qalasynyń 20 jyldyq merekesi aıasynda, maýsym aıynyń 1-2 kúnderi halqymyzdyń ulttyq sporty – teńge ilýden II jáne aýdaryspaqtan III Azııa chempıonatyn ótkizýge baılanysty baspasóz konferensııasy ótti. Sharaǵa Mádenıet jáne sport mınıstri Arystanbek Muhamedıuly men Ulttyq sport qaýymdastyǵy prezıdenti, Májilis depýtaty Bekbolat Tileýhan qatysty.
Jıyndy ashyp, sharanyń maqsat-múddesi jaıly tanystyrǵan Mádenıet jáne sport mınıstri Arystanbek Muhamedıuly, sońǵy ýaqytta mınıstrlik tarapynan ulttyq sport túrlerin damytýǵa zor nazar aýdarylyp otyr. Bul degenimiz – Elbasynyń «Rýhanı jańǵyrý» baǵdarlamasyn iske asyrý jolynda ulttyq kod pen tarıhı sanamyzdy jańǵyrtý úshin qajet, dedi. Sonymen qatar vedomstvo basshysy elordanyń mereıtoıy qarsańynda mınıstrlik óte úlken aýqymdy mádenı sharalar tizbesin josparlap otyrǵanyn da jetkizdi.
Chempıonatqa keletin bolsaq, bul retki dodaǵa Qazaqstan, О́zbekstan, Qyrǵyzstan, Tájikstan, Mońǵolııa, Reseı, Aýǵanstan, Qytaı, Túrkııa qatarly toǵyz memleketten 44 sportshy qatysady, aýdaryspaq saıysy bes salmaq dárejesi (60, 70, 80, 90 jáne +90 kılo) boıynsha ótkiziledi, dedi jarysty uıymdastyrýshylar. Qos chempıonattyń júlde qory – 14 000 000 teńgeni qurap otyr.
Atalmysh sporttyq sharaǵa IýNESKO-nyń Dástúrli sport oıyndary komıtetinen ókilder shaqyrylypty. Ulttyq sport qaýymdastyǵynyń prezıdenti Bekbolat Tileýhannyń pikirinshe, bul qonaqtardyń kelýi – elimizdegi ulttyq sporttyń damý qarqynyna degen álemdik qaýymdastyqtyń qyzyǵýshylyǵyn bildirse kerek. Tipten bolashaqta qazaq etnooıyndarynyń álemdik deńgeıge shyǵýyna esik ashylýy da ǵajap emes.
О́ıtkeni IýNESKO 2021 jyly dúnıe júzi halyqtarynyń etnooıyn túrlerinen olımpıada ótkizýdi josparlap qoıǵan. Ázirge bul sharany qabyldaýǵa Kanada, Japonııa sııaqty elder yqylas bildirýde. Bul jerde atap óterlik jańalyq, mundaı álemdik dodany «biz ótkizeıik» dep elimiz atynan Mádenıet jáne sport mınıstrligi de ótinish bildirgen. «El táýelsizdiginiń 30 jyldyǵy qarsańynda joǵarydaǵy sharanyń elimizde ótýi álem qaýymdastyǵy aldynda zor bedel bolar edi» deıdi Arystanbek Muhamedıuly.
Sondaı-aq baspasóz máslıhatynda málim bolǵandaı, Ulttyq sport qaýymdastyǵy Astananyń 20 jyldyǵyna oraı ulttyq mańyzǵa ıe 20 túrli sporttyq shara ótkizýdi josparlapty. Osylardyń betashary joǵarydaǵy qos chempıonat bolsa, aldaǵy kúnderi at ústinde sadaq atýdan álem chempıonaty, sonymen birge óner-mádenıet salasyndaǵy tanymal tulǵalardyń qatysýymen «Juldyzdy kókpar» jobasy, jyl saıyn ótetin «Altyn tulpar» alaman báıgesi t.b. sharalar kútip tur. Al kókpardan II álem chempıonatyn ótkizýge Túrkııa tarapy qyzyǵýshylyq bildiripti.
Beken QAIRATULY, «Egemen Qazaqstan»