Qaraǵandy oblystyq perınataldyq ortalyǵynda qatarynan tórt sábıdi ómirge ákelgen Regına Gorh aman-esen aıaq-qolyn baýyryna aldy. Kóz tımesin degen bolar, shaqalaqtar sáýir aıynyń basynda dúnıege kelse de, shıraǵansha kópshilikke jarııalamaǵan jas ana men medısınalyq mekeme súıinshi habardy endi ǵana taratyp otyr.
Alǵash ret bosanǵan 32 jastaǵy Regına Gorh birden úsh ul men bir qyzdyń anasy atandy. Aǵaıyn-týysymen jabylyp nárestelerge Emma, Vılgelm, Iogann, Gotlıb degen esimder beripti.
Tórtemniń dúnıege keletini aldyn ala belgili bolǵandyqtan, Regına júktiliginiń 28-shi aptasynan bastap dárigerlerdiń baqylaýyna alynǵan. Perınataldyq ortalyqtyń akýsher-gınekolog mamandary erekshe kútim jasap, júktilik merzimin 31 aptaǵa deıin soza aldy. Bul qursaqtaǵy sharanalardyń meılinshe salmaq jınap, áldenýi úshin qajet bolǵan.
Erli-zaıyptylar alǵashqy sábılerin kútińkirep qalsa da, tórtem ana boıyna tabıǵı jolmen bitken eken. Jaratqannyń bir-aq sátte jarylqaı salǵanyna jas ata-ana dán rıza.
Sábılerdiń eń irisi 1890 gramm bolsa, odan keıingisi 1760 gramm, úshinshisi 1745 gramm, al sońǵysy nebári 1095 gramm tartypty. Degenmen, neonatolog mamandar baryn salyp, bárin de aman alyp qaldy. Shala týylǵan shaqalaqtar bir aı boıy qarqyndy terapııa bólimshesinde qoldan jetildirildi. Odan keıin de jańa týǵandar patologııasy bólimshesinde baqylaýda bolǵan.
Sábıler patologııa bólimshesine aýystyrylǵannan keıin olardyń ákesine de kúndiz-túni jandarynda bolýǵa ruqsat berilgen eken. Balalardy salalyq mamandar da aıryqsha tekserýden ótkizdi. Júktiliktiń aýyr ótýi saldarynan kózine zaqym kelgen jalǵyz qyz Emmaǵa ota jasalyp, sátti aıaqtalǵan. Jas bosanǵan anaǵa da birshama ýaqyt ońaltý sharalary jasaldy. Tórtem kóterý ońaı emes, álsiregen ananyń aǵzasyn perınataldyq ortalyq dárigerleri meılinshe qysqa ýaqyt ishinde qalpyna keltirdi.
Qaırat ÁBILDA, «Egemen Qazaqstan»
QARAǴANDY