О́tken aptanyń sońynda Ortalyq kommýnıkasııalar qyzmetinde Almaty oblysynyń ákimi Amandyq Batalovtyń qatysýymen «Rýhanı jańǵyrý» baǵdarlamasy aıasynda óńirde atqarylyp jatqan sharalar týraly baspasóz máslıhaty ótti.
– Elbasymyzdyń «Rýhanı jańǵyrý» baǵdarlamasyn jetisýlyqtar jyly qabyldap, tek osy maqsatta arnaıy jumys toby qurylyp, baǵytymyz aıqyndaldy. О́tken jeltoqsan aıynda respýblıkada birinshi bolyp oblys ortalyǵynda «Rýhanı jańǵyrý» ortalyǵyn ashtyq, – dep máslıhattyń shymyldyǵyn súıinshileı túrgen Amandyq Ǵabbasuly áńgimesin tómendegishe jalǵady: «Baǵdarlama aıasynda Qarasaı aýdanynda Tuńǵysh Prezıdent – Elbasynyń «Atameken» tarıhı-mádenı ortalyǵy, «Batyr babalar» mýzeıi jańadan salynyp, iske qosyldy. «Rýhanı qazyna», «Tárbıe jáne bilim», «Atameken», «Aqparat tolqyny» sııaqty kishi baǵdarlamalar negizinde 308 joba jasalyp, olardy júzege asyrýǵa 37,1 mıllıard teńge qarajat jumsalady. Onyń ishinde 9,4 mıllıard teńge demeýshiler esebinen tolyqty».
Jalpy alǵanda, oblys boıynsha joǵarydaǵy baǵdarlama ótken jyly 8 myń is-shara ótkizilip, oǵan 1 mıllıon adam tartylǵan. Olardyń qatarynda óner ujymdarynyń qaıyrymdylyq konsertteri, dóńgelek ústelder, konferensııalar, mádenı baıqaýlar jáne taǵy basqa sharalar bar.
Osynda atqarylǵan jumystardyń barlyǵy halyqqa buqaralyq aqparat quraldary arqyly jetken. Naqtyraq aıtqanda, «Rýhanı jańǵyrý» baǵdarlamasy týraly oblystyq buqaralyq aqparat quraldarynda 8 773 maqala jaryq kóripti. Tek ótken jyly óńirlik kommýnıkasııalar qyzmetinde BAQ ókilderi qatysqan 59 brıfıng ótken.
«Rýhanı qazyna» kishi baǵdarlamasy aıasynda óńirde 243 mádenıet úıi kúrdeli jóndeýden ótkizilip, onyń 7-eýine ótken jyly, 13-ine bıylǵy jyly jobalaý-smetalyq qujat ázirlendi. «Týǵan jer» jobasy sheńberinde ótken jyly jalpy somasy 17,7 mıllıard teńge bolatyn 193 joba júzege asyrylsa, «Otanym – taǵdyrym» baǵdarlamasymen 397,3 mıllıon teńgelik 16 joba, «О́lketaný» baǵdarlamasymen 24,4 mıllıon teńgelik 8 joba, «Sanaly azamat» baǵdarlamasymen 456,7 mıllıon teńgelik 16 joba iske asty», dedi oblys ákimi.
Sonymen qatar ólke tarıhyn tanystyratyn «Kıeli oryndardyń elektrondy kartasy» jasalyp, oǵan aımaq aýmaǵyndaǵy 2 343 eskertkish kirse, bulardyń ishinen 58 nysan iriktelip alynyp, 17-sine respýblıkalyq, 41-ine aımaqtyq mártábe berilgen eken.
Oblysta oryndalyp jatqan kelesi bir ıgi sharýa – Orbulaq shaıqasynyń 375 jyldyǵyna arnalǵan «Orbulaq» memorıaldy kesheni men Talǵar aýdany Jańalyq aýylyndaǵy «Saıası qýǵyn-súrgin jáne asharshylyq qurbandary mýzeıiniń» qurylys jumystary bastalyp, aıaqtalýǵa jaqyn. Sondaı-aq oblys basshysy demeýshilerdiń qoldaýymen júzege asyrylǵan asa iri áleýmettik jobalarǵa da toqtaldy. Atap aıtqanda, ««BN INVEST» qarjylyq-óndiristik holdıngi» JShS Qarasaı aýdanyndaǵy Shamalǵan aýylynda 160 mıllıon teńgege halyqtyń áleýmettik áljýaz toptaryna arnap 17 turǵyn úı salyp berse, Asqar Sabırov basqaratyn «Amal Bıo» seriktestigi 30 mıllıon teńgege Eńbekshiqazaq aýdanyndaǵy Ashybulaq aýylynda qaraýsyz qalǵan saıabaqty jańǵyrtyp, balalarǵa fýtbol alańyn jasap bergen.
О́ńirde jastar máselesi de nazardan tys qalmapty. «Jyrǵa tunǵan mekenim – Jetisýym» jobasymen 43 jergilikti aqyn-jazýshynyń kitaptary jaryq kórse, «Jetisý balalar kitaphanasy» jobasy boıynsha alty avtordyń balalarǵa arnalǵan túrli janrdaǵy antologııasy basylyp shyqqan. Bul týyndylardyń jalpy tırajy 24 myń danany qurap otyr.
Sondaı-aq «Jetisýdyń jastarǵa tartýy» jobasy aıasynda jas ólketanýshylar men týrısterdiń «Meniń Otanym – Qazaqstan» oblystyq forýmy ótkizilip, osy baǵyt boıynsha 2017-2022 jyldary 878,4 mıllıon teńge jumsalyp, 40 jobany júzege asyrý jospary da bar eken.
Beken QAIRATULY, «Egemen Qazaqstan»