Ortalyq kommýnıkasııalar qyzmetinde ótken baspasóz máslıhatynda tegin medısınalyq kómektiń kepildendirilgen kóleminiń (TMKKK) jańartylǵan úlgisi tanystyryldy. TMKKK paketi Elbasynyń bıylǵy Joldaýynda bergen tapsyrmasy boıynsha ońtaılandyrylyp jatyr.
Jıynǵa Densaýlyq saqtaý vıse-mınıstri Lázzat Aqtaeva, «Áleýmettik medısınalyq saqtandyrý qory» kommersııalyq emes aksıonerlik qoǵamynyń basqarma tóraǵasy Elena Bahmýtova, Densaýlyq saqtaý mınıstrligi Farmasııa komıtetiniń tóraǵasy Lıýdmıla Bıýrabekova, «SK-Farmasııa» JShS basqarma tóraǵasynyń mindetin atqarýshy Shárip Berik qatysty.
Prezıdent tapsyrmasyna sáıkes, ońtaılandyrý barysynda medısınalyq kómektiń qurylymyn qaıta qaraýǵa, qymbat stasıonarlyq kómekten tıimdiligi joǵary profılaktıkalyq medısınaǵa kóshýge, dıspanserlik baqylaýdy aýrýdy basqarý baǵdarlamalaryna transformasııalaýǵa den qoıylyp otyr. Osyny eskere otyryp, medısınalyq qamsyzdandyrýdyń úsh deńgeıli júıesi usynylǵan. Ol jalpy jurtshylyqqa arnalǵan mınımaldy áleýmettik standart, ıaǵnı TMKKK paketi, áleýmettik medısınalyq saqtandyrý júıesinde saqtandyrylǵandarǵa arnalǵan qyzmetter paketi, sondaı-aq medısınalyq kómektiń ózge qarjy kózderinen qarjylandyrylatyn qosymsha kólemi. TMKKK-niń jańa úlgisi shuǵyl jáne kezek kúttirmeıtin jaǵdaıǵa tap bolǵan ár adamǵa kómek kórsetýge jáne jurtshylyq úshin mańyzy bar syrqattardy baqylaýda ustaýǵa baǵyttalǵan. TMKKK paketiniń jan-jaqty naqtylanǵan tizimi Úkimet qaýlysymen bekitiledi.
Baspasóz máslıhaty barysynda Densaýlyq saqtaý vıse-mınıstri L.Aqtaeva jańa úlgidegi TMKKK paketi úsh kezeń boıynsha engiziletinin atap ótti. «Birinshi kezekte bul – qoldanystaǵy TMKKK paketinde qamtylǵan medısınalyq kómekke revızııa jasaý jáne kómek tizimin naqtylaý. Ekinshiden, MÁMS júıesin engize otyryp, TMKKK-niń jańa úlgisin damytý, úshinshiden, medısınalyq tehnologııalardyń úzdiksiz damýyn eskere otyryp, TMKKK jáne MÁMS paketterin turaqty túrde jańartyp otyrý», dedi ol.
L.Aqtaevanyń aıtýynsha, TMKKK paketinde bastapqy medısınalyq-sanıtarlyq kómektiń barlyq túrlerine kepildik berilgen. Oǵan barlyq azamattarǵa arnalǵan negizgi medısınalyq qyzmetter, nysanaly toptarǵa arnalǵan skrınıngter, júkti áıelder men 1 jasqa deıingi balalardy qaraý, sozylmaly jáne áleýmettik mańyzy bar aýrýlarǵa shaldyqqan turǵyndardy turaqty baqylaý, t.b. jatady.
«25 mamyrdaǵy málimetterge súıensek, Áleýmettik medısınalyq saqtandyrý qory kelisimshart bekitken emdeý mekemelerine 310,7 mlrd teńge qarjy tóledi. Bul halyqqa kepildendirilgen medısınalyq kómek sheńberinde tegin qyzmet kórsetý jóninde bekitilgen kelisimshart somasynyń 45 paıyzyna teń. 2018 jyly kepildendirilgen tegin medısınalyq kómek sheńberinde bekitilgen kelisimsharttardyń jalpy somasy 694 mlrd teńgeni quraǵan bolatyn. Qazirgi tańda qor 1463 medısına uıymymen kelisimshart bekitken. Onyń 613-i jekemenshik klınıkalar», dedi «Áleýmettik medısınalyq saqtandyrý qory» KEAQ basqarma tóraǵasy E.Bahmýtova.
Raýan QAIDAR, «Egemen Qazaqstan»