Memleket basshysy Nursultan Nazarbaev «Bolashaqqa baǵdar: rýhanı jańǵyrý» atty maqalasynda jahandaný dáýirindegi qazaqstandyq mádenıetiniń búgini men bolashaǵyna úlken mán berip: «Biz HHI ǵasyrdyń jahandyq kartasynda eshkimge uqsamaıtyn, derbes orny bar ult bolamyz desek, «Jahandaǵy zamanaýı qazaqstandyq mádenıet» jobasyn iske asyrýǵa tıispiz. Álem bizdi qara altynmen nemese syrtqy saıasattaǵy iri bastamalarymyzben ǵana emes, mádenı jetistikterimizben de tanýy kerek», – degen edi. Osy bastamanyń negizinde Mádenıet jáne sport mınıstrligi alǵa qoıylǵan mindetterdi júıeli júzege asyrý úshin «Jahandaǵy zamanaýı qazaqstandyq mádenıet» atty arnaıy halyqaralyq joba qabyldaǵan bolatyn. Atalǵan joba aıasynda ótetin halyqaralyq «Fokýs-Qazaqstan» kórmesiniń keshendi jospary Astanada ótken baspasóz máslıhatynda tanystyryldy.
Sharaǵa Qazaqstan Respýblıkasy Ulttyq mýzeıi dırektorynyń mindetin atqarýshy Leonıd Kochetov, Qazaqstan Respýblıkasy Ulttyq mýzeıiniń zamanaýı óner ortalyǵynyń jetekshisi Roza Ábenova, halyqaralyq kýrator Devıd Ellıot, «Momentum Time-Based» zamanaýı ónerdiń kommersııalyq emes platformasynyń dırektory Reıchel Rıts-Voloh, sýretshi Almagúl Meńlibaeva, sondaı-aq Mádenıet jáne sport mınıstrliginiń ókilderi qatysty.
«Atalǵan jobanyń basty mindeti – ulttyq sýret ónerin álemdik qaýymdastyqtar arasynda nasıhattaı otyryp, qazaq beıneleý óneriniń qalyptasý jáne damý jolynyń fılosofııasyn, semantıkasyn keńinen tanystyrý. Joba aıasynda ashylatyn tórt birdeı kórmege seksenge jýyq sýretshi qatysady. Alǵashqy sýret kórmesi 1 maýsym kúni Germanııanyń Berlın qalasynda ashylmaq», joba jetekshisi dedi Leonıd Kochetov. Onyń sózinshe, kórmeler Nıý-Iork (AQSh), London (Ulybrıtanııa), Berlın (Germanııa), Sývon (Ońtústik Koreıa) syndy qalalarda ótetin bolady.
Kórme barysynda óner sarapshylarynyń qatysýymen zamanaýı ónerdiń damý tendensııalary, búgingi beıneleý óneriniń kórkem baǵyttary men daralyq stılderi týrasynda arnaıy taqyryptyq is-sharalar ótkizý josparlanǵan. Taqyryptyq mazmuny ár alýan aýqymdy jobany maýsym-qazan aıy aralyǵynda ótkizý josparlanyp otyr. Bul rette sóz alǵan mýzeıdiń zamanaýı óner ortalyǵynyń jetekshisi Roza Ábenova jahandaný álemindegi ulttyq mádenıettiń orny men róliniń mańyzdy ekenine, ereksheligine toqtaldy.
«О́tetin kórmeler taqyryptyq jaǵynan úndes. Ár qaladaǵy is-shara kezinde shaqyrylatyn sýretshiler men halyqaralyq qonaqtar aýysyp otyrady. Ár kýrator baı tájirıbesimen bólise otyryp, jabdyqtalǵan sheberhanalarda sheberlik sabaqtaryn ótkizedi. Art-rezıdensııada ótetin sýretshilermen kezdesýge negizinen tabysty jas sýretshiler qatysady. Osy rette sheberlik sabaqtary, leksııalar, vorkshoptar sııaqty taqyryptyq arnaıy sharalar ótkiziledi», dedi Roza Ábenova.
Aıa О́MIRTAI,
«Egemen Qazaqstan»