Aqtóbedegi «Analar úıinde» tusaýkeser rásimi ótti

«Analar úıiniń» qyzmetkerleri bir jasqa tolǵan balanyń tusaýyn dástúrimiz boıynsha elge syıly, belgili azamattarǵa kestiredi. Bul joly táı-táı basýǵa umtylǵan kishkentaı sábıdiń tusaýyn Aqtóbe oblysy «Atameken» kásipkerler palatasynyń dırektory Nurlybek Muqanov kesti. Shashý shashylyp, barlyq kádeler jasaldy.

«Balanyń ár jetistigin kórý zor qýanysh. Tusaýkeser de osyndaı ultymyzdyń ulaǵatty saltynyń biri. Sábılerimiz súrinbesin, árqashan joldary bolsyn! Barlyq sábı baqytty bolsyn!» -dep Nurlybek Muqanov bata berdi.

Analar úıine túrli qıyn jaǵdaılarǵa dýshar bolyp, balasyn jalǵyz tárbıeleýge májbúr bolyp otyrǵan kelinshekter qabyldanady. Búgingi kúni munda 11 ana men 11 búldirshin tárbıelenýde. Bul jerde áıelderge moraldik, psıhologııalyq kómek berilip, olardyń ómirden óz jolyn tabýyna yqpal etý maqsatynda massaj, shashtaraz, aspaz, tiginshi sekildi mamandyqtar boıynsha ártúrli kýrstar ótkiziledi.

«Biz árbir balaǵa salt-dástúrimizge saı joralǵylardy jasaýǵa tyrysamyz. Osynda shildehana, besik toı, tusaý keser ótkiziledi. Bizdiń negizgi qyzmetimiz – balalardyń jetim qalýyn boldyrmaý. Sábılerdiń analarynyń qasynda bolýy úshin barlyq jaǵdaıdy jasaımyz»,-deıdi Analar úıiniń úılestirýshisi Tańsulý Laqova.

Aqtóbedegi Analar úıiniń demeýshisi-óńirimizden shyqqan belgili mesenat, «Altyn qyran» kompanııasynyń prezıdenti Islambek Saljanov. Ol osy ortalyqtyń barlyq tólemi men shyǵyndaryn ótep, analarǵa qajetti jabdyqtarmen tolyq qamtamasyz etedi. Tańsulý Laqovanyń aıtýynsha, odan bólek oblystyń kásipkerleri de qoldarynan kelgenshe kómek berip turady eken. Aıtalyq, búgin «Batys damý jol» JShS qyzmetkeleri qamqorsyz qalǵan analar men balalarǵa qajetti azyq-túlik, jórgekter men oıynshyqtardy syıǵa tartty. О́z kezeginde «Atameken» kásipkerler palatasynyń qyzmetkerleri ortalyqtaǵy analarǵa kásipkerlik negizderin úıretip, olardyń kásipkerlikpen aınalysýyna qoldaý bildirip otyrady.

Temir Qusaıyn, 

«Egemen Qazaqstan» ​​​​​​​

Aqtóbe