Elbasy bıylǵy Joldaýynda muǵalimderdiń biliktilik deńgeıin eskeretin kategorııalardyń jańa kestesin engizý máselesin kóterip, ony ulttyq biliktilik testileý arqyly berý kerektigine nazar aýdarǵan bolatyn.
Prezıdent tapsyrmasy aıasynda elimizde pedagog qyzmetkerlerge arnalǵan ulttyq biliktilik testileý naýqany 26-28 mamyr aralyǵynda ótti. Ulttyq testileý ortalyǵynan kelip túsken aqparatqa súıensek, respýblıka boıynsha 60 476 muǵalim ulttyq biliktilik testileýden ótýge ótinish bildirdi. Osy oraıda pedagogtardyń oı-pikirlerin bilý maqsatynda Astana qalasyndaǵy testileý ortalyǵyna barǵan edik.
Raıymbek batyr atyndaǵy №50 «Qazǵarysh» mektep-lıseıi tarıh pániniń muǵalimi Saılaý Shaıkenov jalpy testileý barysynyń qıyn bolmaǵandyǵyn aıtady. «Deńgeılik kýrstardan ótpegen, jańa júıemen tanys emes muǵalimder úshin ulttyq biliktilik testileýdiń «Pedagogıka, oqý ádistemesi» blogyn ótý qıyndyq týǵyzatyny ras. Alaıda, osy bloktyń arqasynda pedagogtar ózderin jetildire túsýge umtylady. Jalpy, jetik meńgergen pán boıynsha testileýdi tapsyra almaý múmkin emes. Akademııalyq turǵyda daıyndyǵy bar muǵalimderge qıyndyq týǵyzbaıdy. Biliktilikti arttyra otyryp, jalaqymyzdy da kóterýge múmkindik bar», dedi ol.
Al №70 mektep-lıseıi bıologııa pániniń muǵalimi Serikqaısha Saǵatbekova sabaq beretin páni boıynsha bilimine senimdi bolǵanyna baılanysty testileý kezinde qobaljymaǵanyn aıtady. «Árkim óz qalaýymen testileýge qatysyp jatyr. Testileýdiń barlyq pedagogtar úshin kezekti jáne ýaqytynan burynǵy attestattaý bolyp qala beretini qýantady. Iаǵnı muǵalimderdiń tilekterine baılanysty. Eger jańa oqý jylynan bastap biliktiligiń úshin qosymsha tólemaqy alǵyń kelse, testileýge qatys, al burynǵy biliktiligiń boıynsha jumys isteı bergiń kelse óz qalaýyń. Test suraqtaryna jaýap berý barysynda bir nemese birneshe durys jaýapty tańdaý asa qıynǵa soqqan joq. Alaıda berilgen mátin sheńberinde muǵalimniń akademııalyq jáne ádistemelik áleýetin bilýge baǵyttalǵan mán-mátindik tapsyrmalar boıynsha aıtarlyqtaı ýaqyt jumsap, kóp oılanýǵa týra keldi», dedi S.Qabylǵazyqyzy.
Elordadaǵy №22 mektep-gımnazııasynyń bastaýysh synyp muǵalimi, 25 jyldyq eńbek ótili bar joǵary sanatty ustaz Aıgúl Sadyrbaevanyń paıymdaýynsha, óz biliktiligin únemi arttyryp otyratyn muǵalimder úshin bul oryndy synaq ári kemshin tustardy toltyrý úshin zor múmkindik. Ol ulttyq biliktilik testileýdiń ótkizilý ýaqyty oqý jylynyń qorytyndysy shyǵarylǵan ýaqytqa sáıkes qolaıly bolǵandyǵyn, jańa formattaǵy testileý suraqtarynyń úlgisimen «Egemen Qazaqstan», «Bilimdi el – Obrazovannaıa strana» gazetteri jáne Ulttyq testileý ortalyǵynyń ınternet resýrstarynda tanysqanyn aıtady.
Al №64 mektep-lıseıiniń bıologııa pániniń muǵalimi Ásel Moldabekqyzy «pedagog-moderator» sanatyna ótý úshin óz baǵyn synady. Ol osy testileýdi oqý jylynyń sońynda óz-ózine bergen esep dep baǵalaıdy. «Attestattaýdan ótken muǵalimderge «pedagog-moderator», «pedagog-ekspert», «pedagog-zertteýshi», «pedagog-sheber» degen jańa kategorııalar beriledi degen jańalyqty qýanyshpen qarsy aldym» deıdi Á.Moldabekqyzy.
№79 mektep-lıseıi tarıh pániniń muǵalimi, bilim berý salasynda 24 jylǵa jýyq eńbek etken Maral Bermaǵanbetov búginde ustazdar qaýymy jańartylǵan mazmundaǵy oqý baǵdarlamasy sheńberinde bilim berip jatqanyn, muǵalimderdi attestattaýdan ótkizýdiń jańa formattaǵy júıesi sheńberindegi testileý suraqtary oryndy ári saýatty qurylǵanyn jetkizdi. Al №37 orta mekteptiń qazaq tili men ádebıeti pániniń muǵalimi, 20 jyldyq eńbek ótili bar joǵary sanatty ustaz Arman Ázimhanuly ulttyq biliktilik testileýiniń utymdy tustarymen bólisti. Testileýge bólingen 3 saǵat 20 mınýt suraqtarǵa tolyq jaýap berýge jetkilikti. Árıne, matematıka, fızıka, hımııa, ınformatıka pánderi boıynsha 30 mınýtqa artyq ýaqyt bólingen, bul atalǵan pánderdegi esep-qısapqa baılanysty bolar, deıdi ol.
Sonymen pedagogtardyń biliktilik sanattaryn taǵaıyndaý eki kezeńde júrgiziletinin aıta ketken lázim. Iаǵnı mamyr aıynda testileýden ótken muǵalimder qyzmettiń qortyndylaryn keshendi taldamalyq qorytyndylaý kezeńine qujat tapsyrady. Al testileýden óte almaǵan nemese belgili bir sebepterge baılanysty testileýge qatysa almaǵan muǵalimderdiń aǵymdaǵy jyly qarasha aıynda testileýdi tapsyrý múmkindikteri bar.
Aıgúl TÁShETOVA, jýrnalıst.