Saryaǵashtaǵy 7 jasar balanyń oqıǵasy el arasyna endi taraı bastaǵanda Densaýlyq saqtaý mınıstrligi men Bilim jáne ǵylym mınıstrligi oqıǵany joqqa shyǵarýǵa tyrysqany bárine málim.
Alaıda keıinnen jurttyń jumylýymen másele Elbasy nazaryna deıin jetip, isti jabýǵa tyrysqandardyń taýy shaǵyldy. Keshegi kúnderi KADEX kórmesinde bir adam oqys qaıtys bolǵany belgili. О́rkenıetti qoǵamda mundaı jaǵdaıda sharany uıymdastyrýshy tulǵalar keshirim surap, qatelikti qaıtalamaýǵa ýáde berip jatady. Al bizde kórmege jaýapty Qorǵanys jáne aeroǵarysh ónerkásibi mınıstri Beıbit Atamqulov jýrnalısterden qashyp, suraqty jaýapsyz qaldyrdy. On eki adamnyń ómirin qıǵan menıngıt juqpaly aýrýyna qatysty baspasóz máslıhatyn ótkizgen Densaýlyq saqtaý mınıstri Eljan Birtanov ta osy «úlgiden» uzap ketpedi.
Tótenshe jaǵdaı nemese sozylmaly shıelenis kezinde buqaramen tıimdi baılanys ornatý asa mańyzdy. Álemdik tájirıbede muny krızıs kommýnıkasııasy deıdi. Negizgi ıdeıa – halyqtyń shynaıy aqparatty ýaqtyly alýǵa degen muqtajdyǵyn qanaǵattandyryp, kópshiliktiń úreıge boı aldyrýyna jol bermeý. Aqparat neǵurlym kesh berilse jáne aqparat berýshiniń bedeli tómen bolyp, aıtqan sózderi adamdardyń seniminen shyqpasa el dúrligip, halyqty basqarý qıyndap ketedi.
Búgingi aqparattyq qoǵamda krızıs kommýnıkasııasynyń róli arta tústi. Sebebi resmı mekeme jaǵdaıdy saralap, asyqpaı baıandama jasaımyn degenshe áleýmettik jeliler oqıǵany sanaýly sekýndtar ishinde barsha halyqqa jetkizip úlgeredi. Tıisti uıymnan der kezinde naqty aqparat taramaǵan kezde, el arasynda neshe túrli alypqashpa áńgime kóbeıedi, kúdikter kúsheıedi. Laýazymdy tulǵa turǵyndardyń aldyna shyǵyp, málimdeme jasaımyn degenshe aqparattyq fon teris sıpat alyp, aıtylǵan árbir sóz senimsizdikpen qabyldanady.
Menıngıt aýrýy jedel taraı bastady degen alǵashqy aqparat eki apta buryn paıda boldy. Syrqat belgilerimen aýrýhanaǵa túskenderdiń 15-i menıngokokk ınfeksııasyn juqtyrǵany anyqtalǵan. О́kinishke qaraı, olardyń úsheýi kóz jumǵan bolatyn. Araǵa eki apta salyp, aýrýdy juqtyrǵandar sany 58-ge, ómirden ozǵandar sany 12-ge jetti. Densaýlyq saqtaý mınıstrliginiń ártúrli deńgeıindegi laýazymdy tulǵalar málimdemeler taratyp, saq bolýǵa shaqyryp jatqanymen, mekemeniń birinshi basshysy buqara aldyna keshe ǵana shyqty. E.Birtanovtyń bir saǵattyq máslıhaty halyqty tynyshtaldyrýdan góri odan ári ashý men yzaǵa bólep, halyqtyń sharasyzdyq sezimin týdyrdy. Birjaqty Densaýlyq mınıstrin kinálaýdan aýlaqpyz, bul jerde upaı izdegen jeli qoldanýshylary men sensasııa qýalaǵysh basylymdardyń da «eńbegi» bar. Degenmen, mınıstr krızıs kommýnıkasııasy turǵysynan birneshe qatelik jiberdi dep bilemiz.
Eń áýeli mınıstr qaıtys bolǵan adamdardyń jaqyn týystaryna kóńil aıtyp, marqum bolǵan jandardyń ómirin saqtap qala almaǵany úshin keshirim suraýdan bastaýy kerek edi. Qaıǵyǵa dýshar bolǵandarǵa dál qazir qurǵaq esepten góri adamdyq kóńil kóbirek qajet. Munymen qatar mınıstrdiń juqpaly dertten ómirden ozǵandardy tilge tıek etýi de kópshiliktiń shamyna tıdi. Baıandamasyn tyńdaı otyryp, adamnyń ólimi qaıǵy emes, jaı ǵana statıstıka sekildi. Aýyrǵandar men qaıtys bolǵandardyń sanyn ótken jyldardaǵy kórsetkishtermen salystyryp, 12 adam ólimin qalypty jaǵdaıǵa teńeý arqyly mınıstr men onyń baıandamasyn ázirlegen mamandar sózdiń salmaǵy men halyqtyń janyn túsinbeıtindigin dáleldedi.
E.Birtanovtyń esebinen máseleni sheshýden góri mınıstrliktiń saıasatyn aqtaýǵa degen nıet kóbirek baıqaldy. Dúnıejúzilik densaýlyq saqtaý uıymynyń standarttaryna súıengen mınıstr myrza menıngıtke qarsy vaksınany mindetti ekpeler kúntizbesine kirgizbeýdi óz sózimen negizdep bere almady. Halyq onyń sózderin karantın jarııalaý úshin 12 adamnyń ólimi az, menıngıtten odan da adam kóp qaıtys bolsyn, sodan soń sheshimimizdi qaıta qaraımyz dep aıtqandaı qabyldady. Quddy bir halyqpen saýdalasqandaı áser qaldyrdy.
Degenmen mınıstr E.Birtanovtyń kesh bolsa da, baspasóz máslıhatyn ótkizip, jýrnalısterdiń kóptegen yńǵaısyz suraqtaryna qysylmaı jaýap berýine oń baǵa berýge bolady. Laýazym ıesi osyǵan deıin saqtandyrý isi daýly máselege aınalǵan kezde de halyq arasyndaǵy eń belsendi synshysy Raqym Oshaqbaevpen pikirsaıysqa túsýge kelisip, teledıdardan saqtandyrýǵa qatysty barlyq qarsy dáıekterge jaýap bergeni el esinde. Osylaısha ol halyq aldyndaǵy jaýapkershilikten qashpaıtyndyǵyn kórsetti. Al keshegi máslıhattaǵy kommýnıkasııa qatelikteri mınıstrge tek dáriger bolýdan dárigerlerdiń jumysy men halyqtyń densaýlyǵyna jaýapty memlekettik qaıratker bolýdy úırený qajettigin kórsetse kerek.
Darhan О́MIRBEK, «Egemen Qazaqstan»