...alǵys aıtady
Polısııa qyzmetkerlerine rızamyz
Qaraǵandy oblysy, Nura aýdanynyń Amantaý aýylynyń aýmaǵynan 2017 jyldyń sáýir aıynda jaıylymnan toǵyz bas jylqy joǵalyp, iz-tússiz ketken edi. Sol jyldyń qarasha aıynda osy jylqylar oblystyń Jańaarqa aýdany, Aqtúbek aýylynan tabylyp, kúdikti adam ustalyp, joǵalǵan malymyz túgeldeı qaıtaryldy. Izdestirý sharasyn tııanaqty atqaryp, malymyzdyń tabylýyna sebepker bolǵan Qaraǵandy oblysy Jańaarqa aýdanynyń ishki ister bóliminiń polısııa qyzmetkerleri – maıor Meıram Serikbaev, ýchaskelik ınspektorlary – maıor Nurbol Týkenov, kapıtan Janbolat Muzdybaev, aǵa serjant Saıan Qulshybekov syndy qyzmetkerlerine alǵysymyz sheksiz.
Bul atalǵan azamattar óz qyzmetterine asa jaýapkershilikpen qarap, qarapaıym halyqqa kómekterin bar kúshterimen kórsetkenderine rızamyz. Aty atalǵandar – bilikti maman, óz qyzmetterine jaýapkershilikpen qaraıtyn azamattar ekendikterin kórsetti.
J.TО́LEÝBAEV
Qaraǵandy oblysy, Nura aýdany
...usynys jasaıdy
«Báısheshek» fýtbol týrnıri ótkizilse
Kentaý qalasy ákimdiginiń bastamasymen qalamyzdyń ortalyq fýtbol stadıonynda jasóspirim balalar iriktep alyna bastady. Osy stadıonda «Balalar men jasóspirimder fýtbol mektebi» ashylyp, ony joǵary bilimdi maman Álı Nurymbetov basqardy. Munda barlyq jaǵdaı jasalynyp, sport kerek-jaraǵymen qamtamasyz etilgen. Osy stadıonda 1958-1964 jyldary naýryz aıynda dástúrli túrde «Báısheshek» fýtbol týrnıri ótkizilip, «Qaırat», «Shahter», Kentaýdan «Gornıak», Shymkent qalasynan «Metallýrg» jáne basqa oblystardan komandalar qatysqan bolatyn. Endi osy dástúrli fýtbol jarysyn qaıta uıymdastyrýdyń ýaqyty kelgen sııaqty. Kún jylynyp, báısheshek atqan mezgilde fýtboldyń da mereıi ústem bolary sózsiz.
Asan SAPAROV, Kentaý qalalyq «Ardager» qoǵamdyq birlestiginiń basshysy
...qynjylysyn jetkizedi
Maǵjanǵa bir kósheni qımaǵany qalaı?
Qyzyljar óńiri ulttyń qamyn jegen, halqyna tirek bolǵan tulǵalardan kende emes. Solardyń biregeıi – Maǵjan Jumabaev. Tirisinde kóp azap kórip, sanaly ǵumyry qýǵyn-súrginde ótken aqıyq aqynnyń bıyl atap ótiletin 125 jyldyǵy qarsańynda TÚRKSOI halyqaralyq uıymynyń bastamasymen «Maǵjan jylynyń» atap ótilýi óte quptarlyq shara bolsa kerek. Byltyr kúzde Peterfeld aýyldyq okrýginde kóshe ataýlaryn ózgertý týraly jıyn ótip, Oktıabr kóshesine Alashtyń asyl perzenti, barshanyń súıikti aqyny Maǵjan Jumabaevtyń atyn berý týraly usynys aıttym. Úı-úıdi aralap, qol jınadym. Turǵyndar qýattaǵan hatty aýyldyq okrýgtiń ákimine tapsyrdym. Alaıda jurtshylyqtyń ótinish-tilekteri aýdandyq ákimdik tarapynan eskerýsiz qaldy. Sebebi túsindirilmedi.
Endi myna qyzyqty qarańyz: bıyl aýdandyq «Qyzyljar» gazetinde «Oktıabr» kóshesin – «Jeńis», «Komıntern» kóshesin – «Sentralnaıa» dep aýystyrý týraly aýyldyq okrýg sheshiminiń jobasy basyldy. «Apam da ań-tań, men de ań-tań» demekshi, kózimizge sener-senbesimizdi bilmedik. Demokratııalyq ósip-órkendeý jolyna qadam basqan eldiń qııan shetinde kópshiliktiń tańdaýyn burmalaǵan osyndaı soraqylyqtardyń oryn alýyn aqyn arýaǵyn syılamaý, qorlaý dep sanaımyn. Táýelsizdik alǵanymyzǵa shırek ǵasyrdan assa da, Keńes Odaǵy kezindegi ataýlarǵa jabysyp, eskiniń sarqynshaǵynan aıyrylǵysy kelmeı júrgen sheneýnikterdiń bul áreketi esh aqylǵa syımaıdy. Taǵdyry aıanyshty, aıaýly aqynymyz Maǵjan Jumabaevqa bir kósheniń atyn qımaǵandary qalaı?! «Sentralnaıa», «Iýjnaıa», «Nıjnıaıa», «Verhnıaıa» sekildi maǵynasy túsiniksiz ataýlar murty qısaımastan sol qalpy tur. Túrki jurty «poezııa paıǵambary» retinde pir tutatyn aqynnyń esimi eleýsiz qalmaýy tıis.
Saǵat QÝANDYQOV
Soltústik Qazaqstan oblysy, Qyzyljar aýdany, Peterfeld aýyly
...úlgi tutady
Jastar zııatkerlik oıyndardan synǵa tústi
Mańǵystaý tehnıkalyq kolledjinde «Mańǵystaý aýdandyq jastar resýrstyq ortalyǵy» kommýnaldyq memlekettik mekemesiniń uıymdastyrýymen, kolledj ákimshiliginiń qoldaýymen «Ne? Qaıda? Qashan?» atty zııatkerlik oıyndarynan jarys ótken bolatyn.
Is-sharanyń basty maqsaty – «Rýhanı jańǵyrý» baǵdarlamasynyń mańyzdylyǵyn oıynshylarǵa túsindirý, jastarǵa qazaqstandyq patrıotızmdi nasıhattaý, jastar men oıynshylardyń kóshbasshylyq beınesin qalyptastyrý.
Oıyn úsh bólimnen turdy. Olar «Bilim bıigi», «Daryndylyq», «Beınesuraq» dep ataldy. Oıynshylar mindeti tek kóshbasshylyq qasıetin kórsetip qana qoımaı, komandalyq jumysyn kórsetý edi. Bári de oıdaǵydaı uıymdastyryldy. Birneshe saǵatqa sozylǵan oıynda jas mamandardyń eń kóp suraqqa jaýap bergen «Júırikter» komandasy jeńimpaz atansa, «Bilgirler» komandasy ekinshi, al «Alǵyrlar» komandasy úshinshi oryndy mise tutty.
Aınur ALIEVA, aýdandyq jastar ortalyǵynyń mamany
Mańǵystaý oblysy
...oı bólisedi
Qyz minezdi uldar kóbeıip barady
Qazirgi kezde mektep jasyndaǵy er balalardyń arasynda minez-qulyqtary men is-qımyldary qyzǵa uqsaıtyn jas jetkinshekter kóbeıip barady. О́z basym mundaı kórinister mektepterde tek biryńǵaı áıel ustazdar jumys istegeniniń saldary dep esepteımin. Tipti balabaqshada da erkek kindikti baldyrǵandardy áıel adamdar tárbıeleıdi. Mektepte taǵy da solaı. Ony aıtasyz, orta arnaýly jáne joǵary oqý oryndarynda da negizinen názik jandylar sabaq beredi.
О́neboıy áıel zatynyń aınalasynan shyǵa almaǵan er balanyń keıin naǵyz azamat bolyp qalyptasyp ketýi ońaıǵa túspeıdi. Birinshiden, olardyń boıynda tez ári naqty sheshimder qabyldaı bilý qasıetteri kemshin túsedi. Er-azamatqa tán bitim-bolmys bolýy úshin eń aldymen mektepterde er muǵalimderdiń qataryn kóbeıtý kerek degen oıdamyn. Bul uldardyń boıynda erminezdiliktiń qalyptasýyna áser eteri kámil.
Taǵy bir aıtarym, qazirgi kezde pedagogıka tek biryńǵaı áıelder qyzmet jasaıtyn mamandyqqa aınalyp bara jatqandaı kórinedi. Múmkin mundaı jaǵdaıda arnaıy baǵdarlama qabyldap, muǵalimder daıyndaıtyn arnaýly jáne joǵary oqý oryndarynda er balalarǵa bólinetin kvotany kóbeıtý kerek shyǵar. Sonymen birge olardyń eńbekaqy mólsherin ósirý jóninde de jańasha kózqaras qajet.
Kóshkinbaı AHMETOV, eńbek ardageri
AQTО́BE