Kezinde orta salmaqtaǵy Grýzııanyń tanymal kásipqoı boksshysy Avtandıl Hýrsıdze WBA (Super), IBO, WBC (Interim) jáne IBF nusqalary boıynsha álem chempıony atanyp otyrǵan Qazaqstannyń óreni Gennadıı Golovkınmen judyryqtasýǵa erekshe qulshynys tanytqan edi.
1979 jyly Kýtaısıde týyp-ósken Avtandıl 2002 jyldan beri kásipqoı rıngte kúsh synasýda. Sol kezden beri 37 kezdesý ótkizgen ol 33 ret jeńiske jetip, 22 qarsylasyn nokaýtqa jiberdi. 2 ret utylyp, taǵy 2 básekeni teń aıaqtady. 2011 jyly Hýrsıdze IBO nusqasynyń altyn belbeýin ıelense, 2017 jyly WBO tujyrymy boıynsha ýaqytsha álem chempıony atandy. Grýzııa boksshysy óziniń sońǵy 10 kezdesýiniń barlyǵynda basymdyq tanyttty.
Byltyr Avtandıl Hýrsıdze WBO nusqasynyń tolyqqandy chempıondyq táji úshin ulybrıtanııalyq Bıllı Djo Sonderspen aıqasýǵa tıis edi. Alaıda dál sol jekpe-jek qarsańynda «uıymdasqan qylmystyq topqa qatysy bar» degen kúdikpen ol taǵy 33 adammen birge qamaýǵa alyndy. Qazirgi kezde AQSh soty olardy birneshe aýyr bap boıynsha aıyptaýda. Eger taǵylǵan aıyptar dáleldense, tanymal boksshy 40 jyl merzimge bas bostandyǵynan aıyrylýy múmkin.
Ǵalym SÚLEIMEN, «Egemen Qazaqstan»