Eger álemdegi eń áıgili qos tennısshiniń 32 jasqa deıin qol jetkizgen tabystaryn saralaıtyn bolsaq, ıspanııalyq Rafael Nadaldiń shveısarsııalyq Rodjer Federerden ozyp turǵanyn ańǵarý qıyn emes.
8 tamyzda 38 jasqa tolǵaly otyrǵan Rodjer Federer 32 jasyna deıin iri halyqaralyq týrnırlerde 77 márte bas júldeni oljalaǵan eken. Sonyń ishinde 17 ret «Úlken dýlyǵa» jáne 21 ret «Masters» dodalarynda dara shyqty. Osy jarystarda ol 906 oıyndy óz paıdasyna sheship, 206 kezdesýde utylǵan eken. Al 3 maýsymda 32 jasqa tolǵan Rafael Nadal osy kúnge deıin 79 bas júldeni qanjyǵasyna baılady. Ol «Úlken dýlyǵada» 17 márte top jarsa, «Masterste» 17 ret aldyna jan salmady. Osy básekeler barysynda Pıreneı túbeginiń túlegi 903 márte jeńiske jetip, 187 ret jeńilistiń kermek dámin tatty.
Ázirge Ispanııa tennısshisi osy kórsetkishpen shektelse, Shveısarııanyń sańlaǵy sońǵy bes jylda biraz belesti baǵyndyryp úlgerdi. Qazirgi kezde onyń «Úlken dýlyǵa» týrnırlerindegi jeńisi 20-ǵa jetip otyr. Jáne Federerdiń basqa da iri halyqaralyq jarystarda oljalaǵan júldeleri taǵy bar.
Búgingi tańda aıtýly qos tennısshi álemdik reıtıngtiń kósh basynda keledi. 8770 upaıy bar Rafael Nadal birinshi orynda tursa, 8670 upaıdy enshilegen Rodjer Federer ekinshi satyǵa jaıǵasty.
Ǵalym SÚLEIMEN,
«Egemen Qazaqstan»