Halyq ártisi Ánýar Boranbaevtyń 70 jyldyǵyna arnalǵan is sharalar aldymen Amangeldi aýdanynda ótti. Oǵan Almaty, Astana, Qostanaı, Arqalyq jáne basqa da óńirlerden kelgen qonaqtar Tasty aýylyndaǵy Keıki batyr kesenesine baryp, baba rýhyna quran baǵyshtady.
Odan soń Ánýar Boranbaev atyndaǵy mektepke kelip, onyń aldyndaǵy Án-aǵa eskertkishke gúl shoqtaryn qoıdy. Osy qalyń top sol kúıi halyq batyry Amangeldi Imanov eskertkishine baryp quran baǵyshtady.
Tústen keıin B.Qoldasbaev orta mektebiniń májilis zalynda Á.Boranbaevty eske alýǵa arnalǵan «Dalanyń dara sańlaǵy» atty ǵylymı-praktıkalyq konferensııa ótti. Onda Qostanaı oblysy ákimi apparatynyń jetekshisi Arman Ábenov oblys ákiminiń quttyqtaýyn jetkizdi.
Munan soń Qostanaı oblystyq mádenıet basqarmasynyń basshysy Erlan Qalmaqov, M.Áýezov atyndaǵy teatr dırektory, Qazaqstannyń eńbek sińirgen qaıratkeri A.Maemerov Ánýar Boranbaevtyń teatr ónerine qosqan úlesine baǵa berip, búgingi teatr óneriniń damý máseleri jóninde baıandamalar jasady. Esimderi elge tanymal birqatar tulǵalar jaryssózge shyǵyp, teatr men kıno óneriniń jaryq juldyzy Ánýar Boranbaev ómiri men óneriniń qyrlary jaıynda estelikterimen bólisti. Aýdan ákimi Nurjan О́tegenov mańyzdy sharaǵa kelgen qonaqtarǵa aýdannyń búgingi damýy týraly aıtyp berdi.
«Búgingi is-sharalar Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda ótkizilip otyr, sharanyń negizgi maqsaty daryndy akter, Qazaqstannyń halyq ártisi, óner kóginde jasyndaı jarqyldaǵan jerlesimiz Ánýar Boranbaevty eske alý, talantqa taǵzym etip, urpaqqa ulaǵat-ónege qaldyrý» dep aýdan basshysy konferensııany qortyndylady.
Ulaǵatty basqosý aıaqtalysymen is-shara qonaqtary aýdandyq Mádenıet úıinde M. Áýezov atyndaǵy teatr ártisteriniń «Syǵan serenadasy» qoıylymyn tamashalady. Basty rólderdi Bekjan Turys, Ǵazıza Ábdinabıeva, Nazgúl Qarabalına syndy tanymal akterlar somdaǵan qoıylym óte áserli boldy. Odan soń shara qonaqtary aýdandyq murajaıdy aralap, aýdandyq Mádenıet úıinde aýdan ónerpazdarynyń daıyndaǵan konserttik baǵdarlamasyn tamashalady.
Názıra Járimbet,
«Egemen Qazaqstan»
Qostanaı