Almatyda jyl saıynǵy dástúrli «Jas túlek – 2018» festıvali ótti. Túlekter merekesine qatysqan qala ákimi Baýyrjan Baıbek mektep bitirýshilerdi bilimniń bıik belesterine bastaǵan qadamdaryna sáttilik tilep, jyly lebizin arnady.
Almaty qalasy ákimdiginiń Baspasóz qyzmetiniń málimeti boıynsha, bıylǵy jyly ońtústik astananyń orta mektepterin 9030 túlek bitirse, olardyń 518-si «Altyn belgini» ıegerleri bolyp tabylady.
«Bul kún sender úshin erekshe este qalatyn sát jáne úlken ómirge degen oń qadam! Bilimge degen qushtarlyq, alǵa degen umtylys jigerlerińdi janyǵanda ǵana, izgi maqsattarǵa jetesińder. Árbir azamattyń ómiriniń altyn qazyǵyna aınalatyn mamandyqty laıyqty tańdaýlaryńa tilektespin. Qazaqstannyń patrıoty bolyńdar! Elbasy aıtqandaı, «Sender jetken jetistik – ata-analaryńnyń, týǵandaryń men jaqyndaryńnyń, otandastaryńnyń, Otanymyzdyń jetistigi», - dep atap ótti óz sózinde Almaty qalasynyń ákimi Baýyrjan Baıbek.
Bıylǵy jyly qalanyń barlyq mektepterinde fızıka, hımııa, bıologııa kabınetteri lıngafondy-mýltımedııalyq jabdyqtarmen qamtamasyz etilip, ınternetke tolyqqandy qosylǵan. «Sıfrly Qazaqstan» memlekettik baǵdarlamasy aıasynda aldaǵy oqý jylynda qalanyń 80 mektebinde arnaıy IT lıseıler men IT synyptar ashý josparlanyp otyr.
Almaty qalasynyń oqýshylary on úsh jyl qatarynan respýblıkalyq olımpıadalarda komandalyq birinshi orynnan kórinip keledi. Respýblıkalyq ǵylymı saıystarda 16 márte jeńimpaz atansa, matematıka, fızıka, hımııa men bıologııadan 11-synyp oqýshylary arasynda ótken Prezıdent olımpıadasynda besinshi ret jeńis tuǵyryna kóterildi. Jaratylystaný-matematıkalyq baǵytta alǵash ret ótkizilgen respýblıkalyq jasóspirimder olımpıadasynda qala komandasy birinshi oryndy ıelendi.
Almatynyń qorjynyna halyqaralyq zııatkerlik olımpıadalar men ǵylymı jarystardan bıylǵy jyldyń ózinde ǵana 45 altyn, 68 kúmis jáne 93 qola medal túsken.
Mine, osyndaı zamanaýı mektepterde bilim alyp, jetistikter údesinen kóringen almatylyq túlekterge sát-sapar tilegen qala ákimi olardyń bolashaǵyna úlken senim bildirdi.
Elvıra Serikqyzy,
«Egemen Qazaqstan»
ALMATY