Astanada О́zbekstan Respýblıkasynyń Qazaqstandaǵy elshiligi úıinde О́zbekstan Prezıdentiniń janyndaǵy ókil Dılmýrod Kasımov qazaqstandyq kásipkerlermen jáne jýrnalıstermen júzdesip, óz elindegi bıznes pen ekonomıkanyń damýy, sonyń ishinde sheteldik kásipkerlerge kórsetiletin memlekettik qoldaý týraly egjeı-tegjeıli baıandap berdi.
Sońǵy kezde Qazaqstan men О́zbekstan arasynda ekonomıkalyq qarym-qatynas erekshe jandandy. Elbasy N.Nazarbaevtyń 2018 jyldy «О́zbekstannyń Qazaqstandaǵy jyly» dep jarııalaýy da baýyrlas eki eldiń arasyndaǵy alys-beristiń ekinshi tynysyn ashty. Osy jıynǵa arnaıy qatysqan Qazaqstan kásipkerleriniń quqyqtaryn qorǵaý jónindegi ýákil Bolat Palymbetovtyń aıtýynsha, búginde ózbek jerinde jumys istep jatqan 350-deı qazaqstandyq kompanııanyń 150-i sońǵy reforma bastalǵan bir jyldyń ishinde qurylǵan eken.
– Búginde 2,5 myńdaı ózbekstandyq kompanııa Qazaqstanda qyzmet etedi. Endi mine, ózbek jerinde de qazaqstandyq kásipkerlerdiń emin-erkin jumys isteýine bar jaǵdaı jasalyp jatyr eken. О́zbekstan Prezıdenti janyndaǵy ókildiń áńgimesin tyńdap, sheteldik kásipkerlerge beriletin jeńildikter týraly estip tańǵalyp otyrmyn. Keler jyly kórshi elde Qazaqstan jyly jarııalanbaq. Bul sharalar eki eldiń ekonomıkalyq qarym-qatynasyn odan ári damytady dep oılaımyn, – dedi Bolat Palymbetov.
О́zbekstan tarapy jarııalaǵan derekterge qaraǵanda, eki el arasyndaǵy taýar aınalymy 2018 jyldyń qańtar-mamyr aralyǵynda 1 mlrd AQSh dollarynan asqan. Bul osydan bir jyl burynǵy kórsetkishten 1,5 ese artyq eken. О́zbekstan jaǵy óz eliniń ınvestısııalyq tartymdylyǵyn kóterý úshin tyń reforma bastaǵan. О́zbekstan Prezıdentiniń usynysymen 2017 jyly Prezıdent janynan kásipkerlerdiń quqyqtary men zańdy múddelerin qorǵaýshy ókil ıns- tıtýty quryldy. Kásipkerlikke qatysty burynǵy shekteýlerdiń kóbi joıylǵan. Máselen, bul elge 1-3 mln AQSh dollary kóleminde ınvestısııa salatyn sheteldik kompanııa úsh jylǵa deıin barlyq tabys, keden salyǵynan bosatylady. Investısııa kólemi artqan saıyn salyq jeńildikteri de uzara beredi. О́zbekstan 2025 jylǵa qaraı álemniń eń damyǵan 30 eliniń qataryna enýdi maqsat etipti.
– Qazaqstan Prezıdenti Nursultan Ábishulynyń «Qazirgi zamanda eshbir el, eshbir memleket tomaǵa-tuıyq ómir súrip, ózdiginen damı almaıdy» degen qanatty sózi bar. Ásirese Ortalyq Azııadaǵy kórshiles memleketterdiń ıntegrasııasy álemdi alańdatqan ekonomıkalyq daǵdarystan ońaı shyǵýǵa áser etedi. О́ńirdegi eń iri, irgetasy qalyptasqan eki memleket búkil aımaqtyń óndirisin alǵa súıreıdi. О́zbekstan qazir erekshe ózgeris, serpindi damý qarsańynda. Elde 16 erkin ekonomıkalyq aımaq quryldy. Kásipkerliktiń damýyna barlyq jaǵdaı jasalǵan. Sondyqtan qazaqstandyq kásipkerlerdi bizdiń elge shaqyramyz, – deıdi О́zbekstan ókili Mırshod Nasrýllaev.
Osy jıynǵa qatysqan otandyq bıznes ókilderi О́zbekstanǵa barǵan qazaq bıznesmeniniń alǵashqy qadamyn neden, qaı jerden bastaýy kerektigi, alaıaqtyq, basqa da zańsyzdyqtar kezdesken jaǵdaıda sheteldik kásipkerdiń qorǵalýy, salyq jeńildikteriniń naqty mysaldary jaıly saýaldar qoıyp, oǵan tolyq jaýap aldy. Eki el ara- synda qyzmet etýshi kásipkerlerge arnalǵan ınternet portal qurý jaıy da talqylandy. Qazir qalyptasqan jyly qarym-qatynas, iskerlik baılanystardy odan ári damytý týraly usynystar aıtyldy.
– О́zbekstan – burynǵy О́zbekstan emes, 360 gradýsqa ózgerdi. Bizde eńbek etip, jaqsy tabys tabýǵa barlyq jaǵdaı jasalǵan. Tipti О́zbekstanda sheteldik kásiporyn retinde tirkelip, basqa shetelge ımport shyǵarýshy kompanııalarǵa da memlekettiń úlken qoldaýy bar. Kelińizder, kórińizder! – deıdi О́zbekstan Prezıdentiniń janyndaǵy kásipkerlerdiń quqyqtary men zańdy múddelerin qorǵaýshy ókil Dılmýrod Kasımov.
Qazybek QUTTYMURATULY,
«Egemen Qazaqstan»
ASTANA