Leonel Messı men Krıshtıaný Ronaldý bastaǵan bir shoǵyr ataqty shabýylshylar mýndıalmen qosh aıtysqannan keıin toıdyń sánin qaqpashylar keltirip tur. Horvatııa qaqpashysy Danıel Sýbashıch pen Danııa qaqpashysy Kasper Shmeıhel 3 penaltıden qaıtarsa, Akınfeevtiń arqasynda Reseı quramasy shırek fınalǵa joldama aldy.
Reseı-Ispanııa arasyndaǵy oıynda anyq favorıt Ispanııa edi. «Qyzyl fýrııa» talaı qarsylasty shań qaptyrǵan azýly ujym. 2008 jyly Eýropa chempıonatynda toptyq kezeńde ıspanııalyqtar Reseıdi 4:1 jeńdi. Keıinnen osy týrnırdiń jartylaı fınalynda 3:0 basym tústi. Biraq odan beri de eki komanda túbegeıli ózgerip ketti. Oǵan keshegi oıynda kózimiz anyq jetti. Eýropa men Álem chempıonatyn qatar jeńgen ıspanııalyqtar Reseıdi jarys qojaıyny bolsa da, qyspaqqa aldy. Oıynnyń 12-mınýtynda Serhıo Ramostyń arqasynda olar esep ashty. Biraq gol Sergeı Ignashevıchtiń atyna jazyldy. Bul bıylǵy birinshiliktegi 9-avtogol.
Alyp deneli shabýylshy Artem Dzıýba baspen soqqy jasap jatqanda dop Jerer Pıkeniń qolyna tıip ketti. Tóreshi esh oılanbastan penaltı belgiledi. Dzıýba 11 metrlikten múlt ketpedi. Tarazy basy teńesip, tablodaǵy kórsetkish 1:1 boldy. Odan keıingi oıyn súreńsiz ótip, match ekstra-taımǵa ulasty. 15 mınýttan turatyn eki taım Reseıge de, Ispanııaǵa da esh paıda ákelgen joq. Bapkerin aýystyrǵan Ispanııa Lopategıdiń joqtyǵyn anyq sezindi. Tájirıbıesi joq Fernando Ierro qysyltaıań sátte oıyn taktıkasyn ózgerte almady. Biliktiligi jetispedi me, joq álde shákirtterine durys baǵyt bere almady ma, áıteýir oıyn penaltı serııasyna aýysty. Quramaǵa jańadan alynǵan jartylaı qorǵaýshy Koke men shabýylshy Aspas óz múmkindikterin golǵa aınaldyra almady. Esesine, eki penaltı qaıtarǵan Akınfeev quramany kelesi kezeńge alyp shyqty. Endi Stanıslav Cherchesov komandasy shırek fınalda Horvatııa quramasymen kúsh synasady.
Ekinshi oıynda Horvatııa Danııamen kezdesti. Bul oıyn aldyńǵysynyń aına-qatesiz kóshirmesindeı boldy. Aldymen jyldam soǵylǵan goldar oryn aldy. Nebári 53 sekýndta Matıas Iorgensen buryshtama kezinde esep ashty. Araǵa 3 mınýt salyp qorǵaýshy qateligin paıdalanǵan Marıo Mandjýkıch jaǵdaıdy teńestirdi. Odan keıin de shaqpaq jeıdelilerdiń gol soǵatyn birneshe múmkindigi boldy. Biraq Kasper Shmeıhel shyn sheber ekendigin dáleldep berdi. Onyń ústine osy matchty trıbýnadan ákesi de tamashalady. Kezinde ataqty qaqpashy bolǵan Peter Shmeıhel ulynyń ónerine dán rıza edi. Sebebi Kasper 116-mınýtta Lýka Modrıch tepken penaltıdi qaıtardy. Sońyna deıin berispeı kúresken danııalyqtar penaltı serııasyna jetkenine qýandy. Sebebi qaqpashysy penaltı tosýdyń Has sheberi edi.
Biraq komanda kapıtany Krıstıan Erıksen kútpegen jerden múlt ketti. Aǵylshyn premer-lıgasynda talaı penaltı men aıyp doptaryn golǵa aınaldyratyn Krıstıanǵa ne kesir jabysqanyn eshkim túsine almady. Alaıda alańǵa almasyp kirgen, kúsh qýaty sarqyla qoımaǵan Mılan Badel de penaltı soqpady. Dopty Kasper Shmeıhel qaıtardy. Odan keıin eki komanda eki-ekiden gol soqty. Kezek taǵy da almasyp kirgen Lasse Shónege keldi. Dat oıynshysynyń penaltıin Danıel Sýbashıch qaıtaryp jiberdi. Horvat qaqpashysy da Kasperden esh qalyspady. Degenmen alańǵa almasyp kirgen taǵy bir oıynshy Pıvarıch Shmeıhelden aılasyn asyra almady. Shynyn aıtqanda, penaltıdi alańǵa almasyp kirgen tyń oıynshylardyń eshqaısysy da soqpady. Mine, mundaı da bolady eken. Sebebi 4-soqqyny jasaǵan Nıkolaı Iorgensenniń soqqysyn Sýbashıch tyrp etkizbeı qaqshyp aldy. Al sońǵy sózdi Ivan Rakıtıch aıtty. Ol qaqpashy men dopty eki jaqqa jiberip, bos buryshty dál kózdedi. Horvatııa kelesi kezeńge ótti. Tartysty ótken penaltı serııasy kópke deıin umytylmastaı boldy.
Ermuhamed Máýlen, «Egemen Qazaqstan»