Martıne RIVASI-OFFANT, sýretshi (Fransııa):
– Astana – jańa qala. Bul memleket úshin jaqsy, al sýretshige peızaj kerek. Sondyqtan da bolar, basynda Astanaǵa saparym qalaı bolady eken dep ýaıymdadym. Biraq qala mańyndaǵy ádemi kórinisterdi kórgennen keıin jaqsy kórip kettim. Astanada men garmonııany sezindim. Jazyq dalada boı kótergen erekshe qala. Ásirese qys mezgilinde óte sulý. Al sol jaǵalaýda zamanaýı stıldiń kýási bolsań, oń jaǵalaýda eski qalanyń kórinisi ashylady. Bul sabaqtastyqty sýretshi retinde erekshe jyly qabyldadym.
Nıkolıa RÝChTI, qoǵammen baılanys mamany (Shveısarııa):
– Men burynnan Azııa memleketterin jaqsy kóremin. Birneshe jyl Qytaıda turdym. Keıin Qazaqstanǵa barýǵa múmkindik týdy. Shynymdy aıtsam, postkeńestik elderdiń biri bolǵandyqtan, sol zamannyń arhıtektýrasyn kóretin shyǵarmyn degen kúdik basym boldy. Biraq Astanaǵa kelgende, qalanyń sulýlyǵyna erekshe tamsandym.
«Tour de France»-qa jıi qatysatyn «Astana» velokomandasyn bizdiń elimizde kóp adam biledi. «Astana» velokomandanyń ataýy retinde ǵana qabyldanady. Biraq óz kózimmen kórgen soń, men endi qala týraly kóp aıtatyn bolamyn.
Sınan ÝDIL, menedjer (Ankara):
– Astanamen tanystyǵym birneshe jyl buryn ǵana boldy. TMD elderiniń ishinde eń unaǵany, júregime jaqyny osy shahar ekenin túsindim. Astanaǵa kelgen bette adamdardyń bilimdiligin kórip, tańǵaldym. Odan keıin qalanyń bir-birine uqsamaıtyn, arhıtektýrasy erekshe ǵımarattary tamsandyrdy. «Han Shatyr» kesheniniń ózi qaıtalanbas arhıtektýra ekeni, álemde oǵan uqsas ǵımarattardyń joq ekeni elordanyń ereksheligin kórsetse kerek.
Gabrıel MAKGÝAIR (AQSh):
– Men Ortalyq Azııanyń mádenıeti men ádebıetine qyzyǵyp, Qazaqstanǵa qazaq tilin úırený úshin bardym. Aldymen Ońtústik Qazaqstanda turdym. AQSh-qa ketpes buryn Astanada jumys isteý týraly oılana bastadym. 2007 jyly Astanaǵa qydyryp keldim. Qalada bıik ǵımarattar kóp, kóshede adam az bolǵany maǵan tańsyq kórindi, tipti ǵylymı fantastıka sekildi boldy. Qazir qala ózgergen. Meni eń birinshi tańǵaldyrǵany – 20-dan asqan, jumysy, turaqty tabysy bar adamdardyń ata-anasymen turýy boldy. Bizde ata-anańdy tek demalys kúnderi kórýge baryp qaıtatyndyqtan, bul dástúr erekshe áser etti, ári birden qurmetteýge laıyq úrdis eken dep oıladym. Sebebi bul týystyq qarym-qatynastyń beriktigin kórsetedi.