Qostanaıda Astana kúni merekesi kúni «Best-Kostanaı» dıirmeni paıdalanýǵa tapsyryldy. Onyń ashylý saltanatyna oblys ákimi Arhımed Muhambetov qatysyp, jańa zamanaýı kásiporynnyń qatarǵa qosylýymen quttyqtap, ony Astananyń 20 jyldyǵy merekesine zor tartý ekenin aıtty. Dıirmen kesheniniń quny 4,5 mıllıard teńgege tústi.
«Astananyń 20 jyldyq toıy Qazaqstannyń damý jolynda ekenin kórsetedi. Osy mereke qurmetine oblysta taǵy bir zamanaýı kásiporyn qatarǵa qosyldy. Táýligine 700 tonna un shyǵaratyn «Best-Kostanaı» dıirmen kesheni elimizde jyldam engizilip otyrǵan «Sıfrly Qazaqstan» baǵdarlamasynyń barlyq talaptaryna jaýap beredi. Keshenge jumsalǵan barlyq qarjynyń 2 mıllıard 800 mıllıon teńgesin tikeleı shetel ınvestory saldy. Bul dıirmen kesheni bizdiń eldiń ınvestorlyq jaǵdaıynyń qolaıly ekenin de kórsetti. Túrik aǵaıyndar qarjysyn eshqandaı qaýipsiz senimmen ekonomıkaǵa saldy», dedi óńir basshysy Arhımed Muhambetov.
Dıirmen kesheniniń ereksheligi, ony jer júziniń kez kelgen núktesinde otyryp basqarýǵa bolady. Barlyq jumys avtomattandyrylǵan, kompıýterlendirilgen. Bul jóninde osy dıirmen kesheniniń absqarma tóraǵasy Nıhat Jan da aıtyp ótti.
«Men Amerıkada otyryp ta «Best-Kostanaı» dıirmen kesheninde búgin táýligine qansha tonna un óndirilgenin bilip otyramyn. О́rkenıet degen osy. Osydan birneshe jyl buryn Shveısarııada ótken kórmede biz «Dúnıedegi eń sapaly un» atalymymen medal alǵan edik. Eń jaqsy un Qazaqstanda, onyń ishinde Qostanaıda. О́ndirilgen ónimniń 95 paıyzy eksporttalady», deıdi ınvestor Nıhat Jan myrza.
Kásiporyn dırektory Vıdadı Iýsýbovtyń aıtýynsha, «Best-Kostanaı» kompanııasy Qostanaıda 2009 jyly alǵashqy dıirmenin ashqanda ol táýligine 250 tonna un tartatyn. Al búgingi dıirmen kesheniniń qýaty odan úsh esedeı artyq. Dıirmen kesheninde qazir 70 adamǵa jumys berilgen. Aldaǵy ýaqytta munan da kóbeıetin bolady.
Názıra Járimbet
«Egemen Qazaqstan»
Qostanaı
Sýretter top-news.kz saıtynan alyndy