Astanada birinshi aýyr salmaqtaǵy WBA tıtýly úshin kezdesý aıaqtaldy. Qazaqstandyq belgili boksshy Beıbit Shúmenov túrik sportshysy Hıznı Altynkaıdy jeńip, bos turǵan WBA beldigine ıe boldy.
Birinshi raýndtaǵy 30 sekýndtyq barlaýdan keıin Shúmenov birden taktıkasyn ózgertip, shabýylǵa basty. Alaıda Hıznıdiń qorǵanysy berik bolǵanyn aıta ketý kerek. Alǵashqy raýndtyń aıaqtalýyna bir mınýt qalǵanda Beıbit qarsylasynyń búıiri tusynan qaqyrata soǵyp, tizertelip tastaǵan edi. Dese de, ornynan kóterilgen túrik boksshysy ońaı berile qoımaıtynyn kórsetti.
Ekinshi raýndta Beıbit basymdyǵyn saqtaı otyryp, búıirden soqqyny jıi jasady. Alaıda buǵan túrik boksshysy daıyn ekenin baıqatty. Úshinshi jáne tórtinshi raýndta da otandasymyzdyń basym ekeni aıqyn baıqalǵan edi. Besinshi raýnd kelgende Altynkaı da shabýylymen kózge túsip, kórermender naǵyz boksty kórgendeı boldy. Dese de, atalmysh raýndta eshqandaı nogdaýn tirkelgen joq. Segizinshi raýndta Altynkaı birneshe aýyr soqqylardy jiberip aldy. Toǵyzynshy raýndta Altynkaı nogdaýnǵa túsip, tóreshi esep ashty. Kórermenderdiń kóz aldynda Altynkaı úshin jeńistiń aýyly alystap bara jatqany anyq kóringen edi. Toǵyzynshy raýndtan keıin túrik boksshysynyń tarapy Altynkaıdy kelesi raýndqa shyǵarýdan bas tartty. Osylaısha, Beıbit Shúmenov 10-shy raýndta jeńiske jetti.
Aıta ketsek, Beıbit Shúmenov pen Hıznı Altynkaıǵa deıin 10 qazaqstandyq boksshy sharshy alańǵa shyǵyp, barlyǵy da jeńiske jetken bolatyn.
inform.kz