Elorda toıy álem elderinde atalyp ótti

Elorda toıy­ –­ Nıý-Iorkte

Qazaqstannyń Nıý-Iork­tegi Birikken Ulttar Uıymy janyndaǵy Turaqty ókildiginde Astananyń 20 jyldyǵy atap ótildi. Saltanatty qabyldaýǵa Birikken Ulttar Uıymynyń túrli qurylymdarynyń bas­shylary, BUU-ǵa múshe mem­leketterdiń ókilderi, halyq­aralyq uıymdardyń bólimshe basshylary men Nıý-Iorktegi BUU janyndaǵy úkimettik emes uıymdardyń basshylary, sarapshylar men jýrnalıster qatysty.

Keshti ashqan Qazaqstannyń BUU janyndaǵy Turaqty ókili Qaırat Omarov Astananyń qa­lyptasý tarıhy, qalanyń zamanaýı damýy men álemdik arenadaǵy róli týraly má­lim­dedi. Ol Astananyń je­tis­tikteri Qazaqstannyń Tuń­ǵysh Prezıdenti Nursultan Nazarbaevtyń esimimen tyǵyz baı­lanysty ekenin aıtty.

BUU Bas hatshysynyń oryn­basary, Eń nashar damy­ǵan elder, teńizge shyǵar jol­dary joq damýshy elder, jáne shaǵyn araldardaǵy damý­shy elder boıynsha BUU Jo­ǵar­ǵy ókili Fekıtamoeloa Ýtoıkamaný Qazaqstan as­tanasynyń mereıtoıymen quttyqtady. О́z sózinde ol As­tana úmit pen tabysty trans­formasııanyń sımvolyna aı­nal­ǵanyn atap ótti. Sonymen qatar BUU Bas hatshysynyń saıası máseleler jónindegi oryn­basary Rozmarı DıKarlo da Astananyń serpindi jáne qyzyqty qala ekendigin aıtty.

Is-shara barysynda «Astana – beıbitshilik qalasy» fılmi kórsetildi, sondaı-aq Qazaqstan Respýblıkasy Tuńǵysh Pre­zı­denti Qory ázirlegen As­tananyń 20 jyldyq mereı­toıy­na arnalǵan «A Day in Astana» mereıtoılyq fotoalbomy usynyldy.

Túrkııadaǵy torqaly toı

Qazaqstannyń Túrkııadaǵy elshiligi Astananyń 20 jyl­dy­ǵyna oraı «Uly Dala Astanasy» atty halyqaralyq konferensııa uıymdastyrdy. Is-sharaǵa Túrkııa Respýb­lıkasy Prezıdentiniń Bas keńes­shisi Iаlchyn Topchý, Uly Ulttyq Májilisiniń eks-spıkeri Hıkmet Chetın, bu­rynǵy Mádenıet mınıstri Namyk Kemal Zeıbek, burynǵy Densaýlyq saqtaý mınıstri Halıl Shyvgyn, Qoja Ahmet Iаsaýı ýnıversıteti О́kiletti keńesiniń tóraǵasy Musa Iyl­dyz jáne túrik zııa­ly qaýymy, kásipkerler men iskerleri, elshiler men sheteldik dıploma­tııalyq mekemelerdiń ókilderi qatysty.

Jıyndy Qazaqstannyń Túrkııadaǵy elshisi Abzal Saparbekuly quttyqtaý sózben ashyp, «Túrkııanyń Qazaqstan táýelsizdigin alǵashqylardyń biri bolyp moıyndaǵanyn, baýyrlas eki el arasynda tyǵyz qarym-qatynas ornap, Elbasy bastamasymen irgesi qalanǵan Astananyń qurylysyna túrik ınvestorlary men kásipkerleri belsene atsalysqanyn atap ótti.

Túrkııa Prezıdentiniń Bas keńesshisi Iаlchyn Topchý: «Bolashaqta qazirgi álem tarıhy jazylar ýaqytta Qazaqstan men qazaq túrkileri bóliminde «Tuńǵysh Prezıdent», «túr­ki dúnıesiniń Aqsaqaly Nursultan Nazarbaev», «As­tana qalasy» degen sózder bir uǵymǵa aınalyp, qatar atalatyn bolady. Nursultan Nazarbaev táýelsiz eldiń sım­­voly retinde Astanany irge­tasynan bastap túbegeıli jos­parlap, árbir ǵımarattyń qu­rylysyn qaltqysyz qada­ǵalap, ár kirpishin qamqor qol­men qalady», dedi.

Jıynnyń aıasynda As­tananyń 20 jyldyǵyna el­shiliktiń tartýy retinde qazaq jáne túrik tilderinde jaryq kórgen «Uly Dala Astanasy» atty kitaptyń arnaıy tanys­tyrylymy ótti.

Ázerbaıjan astanasyndaǵy aıryqsha kórme

Ázerbaıjan astanasyndaǵy Geıdar Alıev ortalyǵynda Qa­zaq­stan elordasynyń 20 jyldyǵyna arnalǵan «As­­tana – Uly Dala jaý­hary» atty fotokórme ótti. Is-­shara Qazaqstannyń Tuń­ǵysh Pre­zıdenti – Elbasy qory­nyń, Qazaqstannyń Ázerbaıjandaǵy el­shiliginiń jáne Geıdar Alıev Qo­rynyń uıymdastyrýymen ótti.

Mádenı sharany Tuńǵysh Prezıdent-Elbasy qory at­­qarý­shy dırektorynyń oryn­­basary Igor Rogov pen Geı­dar Alıev ortalyǵy dırek­torynyń birinshi orynbasary Adıl Kerımlı ashty.

Fotokórmeni Ázerbaı­jan­­nyń belgili memleket qaırat­kerleri, dıplomatııalyq korpýs, mádenıet qaıratkerleri jáne jýrnalıster tamashalady. Qurmetti qonaqtardyń ishinde Ázerbaıjan Parla­mentiniń depýtattary, Vene­sııalyq Komıssııanyń Prezı­denti Djannı Býkıkkıo jáne Ázerbaıjannyń Konstı­týsııalyq sotynyń tóraǵasy Farhad Abdýllaev bastaǵan Eýropa jáne TMD elderiniń Konstıtýsııalyq sottarynyń basshylary boldy.

Mádenı is-shara barysynda kelgen qonaqtarǵa Astananyń 20 jyldyǵyna arnalǵan «A Day in Astana» fotoalbomy jáne «Býrabaı» ulttyq memlekettik tabıǵı baǵyna arnalǵan «A Day in Burabay» atty fotoalbomdary tartý etildi.

Horvatııadaǵy jıyn Astananyń damý tarıhyna arnaldy

Horvatııa astanasy Zag­reb qalasynda Qazaqstan elor­­­dasynyń 20 jyldyǵyna oraı «Astana – Qazaqstannyń táýel­sizdigi men progrestiń rá­mizi» atty dóńgelek ústel oty­rysy ótti. Is-sharany Qazaq­stannyń Horvatııadaǵy elshiligi «Horvatııa-Qazaqstan» dostyq qoǵamymen birlesip uıymdastyrdy.

Jıyn barysynda Qazaq­stannyń jańa elordasyn qurý tarıhy jáne onyń eldiń saıası, áleýmettik-ekonomıkalyq jáne mádenı damýyndaǵy róli týraly mýltımedııalyq tanystyrylym jáne fılm kórsetildi.

Otyrysqa qatysýshylar Qazaqstan Prezıdenti Nursultan Nazarbaevtyń ja­ńa elorda qurýdaǵy kórnekti róline keńinen toqtaldy. So­nymen qatar Astananyń álem­dik únqatysý, senim jáne ózara túsinýshilik ortalyǵy retindegi orny da aıryqsha atalyp ótti. 

Aýstrııadaǵy saltanatty kesh

Qazaqstannyń Aýstrııadaǵy  elshiliginde Astananyń 20 jyl­­dyǵyna jáne Qazaqstan dıp­­lo­matııalyq qyzmet kúnine oraı saltanatty kesh ótti.

Kezdesýde Elshi Qaırat Sarybaı qonaqtarǵa BUU Qaýipsizdik Keńesindegi qazaq dıplomattary jumysynyń nátıjeleri týraly málimdep, Astanada ótken mańyzdy bas­tamalarymen, onyń ishinde EQYU, AО́SShK, IYU, ShYU, TMD, EEO sammıtteriniń, álemdik jáne dástúrli dinder kóshbasshylarynyń sezderi men EKSPO-2017 kórmesiniń qorytyndylarymen tanystyrdy.

Qazaqstan dıplomattaryn Astananyń 20 jyldyǵymen jáne kásibı merekesimen qut­­tyqtaýǵa Aýstrııa jáne Slo­venııa qoǵamdyq-saıası top­tarynyń, Aýstrııa SIM-niń, dıplomatııalyq korpýstyń ókilderi, Aýstrııa jáne Slo­ve­nııadaǵy Qazaqstannyń Qur­metti konsýldary, halyq­aralyq uıymdarda jumys isteıtin qazaqstandyq azamat­tar, Aýstrııa-Qazaqstan qoǵa­mynyń ókilderi, qazaq dıasporasy men stýdentter qatysty.

Saýd Arabııasynda bas qalanyń sáýleti tanystyryldy

Qazaqstan Respýb­lı­ka­synyń Saýd Arabııasy Korol­digindegi elshiligi ǵımaratynda Astana qalasynyń 20 jyldyq mereıtoıyna oraı fotokórme uıymdastyryldy.

Fotokórmege Saýd Ara­bııasynyń laýazymdy tul­ǵalary, isker toptary, mádenı tulǵalar, dıplomatııa jáne BAQ ókilderi qatysyp, Astana qalasynyń ásem beınesi men negizgi arhıtektorlyq erekshe oryndary, sondaı-aq Qazaqstannyń alýan túrli tabıǵaty beınelengen sırek ekspozısııalardy tamashalady.

Daıyndaǵan Qambar AHMET,

«Egemen Qazaqstan»