Oblys ákimi Danıal Ahmetovtiń bastamasymen «2018-2020 jyldarǵa arnalǵan meniń aýlam» baǵdarlamasy qabyldanǵan-dy. Bıyl kóp qabatty turǵyn úılerdiń mańyndaǵy on eki aýlany abattandyrýǵa qalalyq bıýdjetten 611 mıllıon teńge bólingen.
– Semeıdiń kóshelerin jáne aýlalardy abattandyryp, gúldendirip, kóriktendirýge qalalyq bıýdjetten 1 mıllıard 196 mıllıon teńge bólindi, – dedi qala ákimi Ermak Bıdahmetuly. – Bul jumysty kún saıyn qadaǵalap otyrmyz. Salamatty ómir saltyn qalyptastyrý úshin qalanyń ár jerlerinde 11 sporttyq alań salyný josparlanǵan. Oǵan 90 mıllıon teńge qarajat berildi. Ásirese qala turǵyndary arasynda qoldaý tapqan Abaı alańyn jóndeýge 87 mıllıon teńge bólinýi óte quptarlyq boldy.
Qala kóshelerin kúrdeli jáne aǵymdaǵy jóndeýge osy jylǵa 2 mıllıard 235 mıllıon teńge bólindi. Jyl saıyn qala kósheleriniń jóndelýi turǵyndar tarapynan qoldaý taýyp otyr.
Semeı qalasy ákiminiń baspasóz máslıhatynda taratqan derekterge súıensek, kóptegen jyldar boıy jóndelmegen Áset Naımanbaev kóshesi aǵymdaǵy jóndeýden ótýde. Sonymen qatar avtokólikter kóp júretin Táńirbergenov, Tıtov, Ormandy, Qabanbaı batyr, Aımaýytov jáne taǵy basqa kósheler jóndelýde. Qazirgi ýaqytta 36 kóshe joldary aǵymdaǵy jóndeýden ótti.
Raýshan NUǴMANBEK, jýrnalıst
SEMEI