Ýkraınanyń Odessa qalasynda bokstan halyqaralyq dárejedegi sport sheberi, KSRO chempıonaty men KSRO halyqtary spartakıadasynyń júldegeri, birqatar halyqaralyq dodalardyń jeńimpazy Semen Trestındi eske túsirýge arnalǵan týrnır ótti.
Qara teńiz jaǵalaýynda ótken jarysta Qazaqstannyń bes boksshysy baq synap, sonyń ekeýi elge júldemen oraldy. Olar – Álisher Aıatqojanov (49 kılo) pen Damır Ábdiqadyr (52 kılo). Jartylaı fınalda Álisher ızraıldik Davıd Alaverdııanan utylsa, Damır ýkraıanlyq Damır Fatıshke ese jiberdi.
Al Asan Erýbek (60 kılo), Asqar Erýbek (64 kılo) jáne Maksım Meltonıan (+91 kılo) tusaýkeser kezdesýlerinde jeńilis tapty. Jarys nátıjesi boıynsha 10 salmaq dárejesindegi bas júldeniń teń jartysyn Ýkraına quramasy oljalasa, Grýzııanyń boksshylary eki bas júldeni ıelendi. Sondaı-aq, Izraıl, Iordanııa jáne Moldovanyń ókilderi de bir-bir retten top jardy.
Ǵalym SÚLEIMEN,
«Egemen Qazaqstan»