Kóptegen sheteldik azamattar úshin Qazaqstandaǵy bilim naryǵy tartymdylyǵymen erekshelenedi. Osy oraıda ál-Farabı atyndaǵy QazUÝ joǵary oqý oryndarynyń reıtıngi boıynsha otandyq bilim berýdiń kósh basynda tur deýge negiz bar. Atalǵan ýnıversıtette aǵylshyn tilinde bilim berýmen qatar 70-ten astam qos dıplomdy baǵdarlamalar júzege asyrylyp keledi.
Búginde alys jáne jaqyn shet elderden 150-den astam talapker Ulttyq ýnıversıtetke túsý úshin onlaın júıe arqyly tirkelip, qujattaryn tapsyrdy. Qazir olardyń ótinishteri qabyldanyp, endigi kezekte oqý ornyna talapqa sáıkes qashyqtyqtan qabyldana alady. Brazılııa, AQSh, Fransııa, Germanııa, Indonezııa, Ońtústik Koreıa, Túrkııa, Úndistan jáne taǵy basqa memleketterdiń azamattary osy júıe arqyly ótinishterin bildirip otyr.
Ýnıversıtettiń Oqý isi jónindegi prorektory Asqar Hıkmetov bıyl sheteldik stýdentterdiń úlken legi qabyldanatynyn jetkizdi. Joǵary halyqaralyq standarttarǵa saı keletin bilim berý baǵdarlamalary, sondaı-aq aǵylshyn tilinde oqý múmkindigi, zamanaýı kitaphana, stýdentterge qyzmet kórsetý ortalyǵy, sport kesheni jáne jaıly jataqhanalar ornalasqan biregeı ýnıversıtet kesheni talapkerlerdiń qyzyǵýshylyǵyn týǵyzýda. Ulttyq ýnıversıtette olar sapaly bilim alýmen qatar ǵylymı jáne shyǵarmashylyq áleýetin júzege asyrýǵa múmkindik alady.
Jańa oqý jylynda 600 sheteldik stýdent qabyldanady dep josparlanǵan. Jalpy medısına, aqparattyq júıeler, halyqaralyq qatynastar, menedjment, bıotehnologııa, qazaq jáne orys tilderin oqý sııaqty mamandyqtar joǵary suranysqa ıe bolyp otyr.
Elvıra Serikqyzy, «Egemen Qazaqstan»