Indonezııanyń Lombok aralynda 5 tamyz kúni bolǵan joıqyn jer silkinisi saldarynan 20 myńnan astam adam baspanasyn tastap shyǵýǵa májbúr boldy, dep habarlaıdy TASS.
Tabıǵı apattardy toqtatý ulttyq agenttiginiń resmı ókili Sýtopo Nýgrýho 20 myńnan astam jergilikti turǵyn qaýipsiz aımaqqa kóshirilgenin málimdedi. Budan tys, Lombokqa kórshiles jatqan kishigirim araldardaǵy sheteldik týrıster de evakýasııalanǵan. S. Nýgrýhonyń aıtýynsha, qurbandar sany 98 adamǵa jetken.
«Qaza tapqandardyń barlyǵy - jergilikti turǵyndar. 230-dan astam adam jaraqattanǵan», - deıdi ol. Sheneýnik úıindilerdiń arasynan adamdardy qutqarýǵa aýyr tehnıka jetispeıtindikten, qurbandar sany artýy múmkin ekenin aıtyp dabyl qaǵýda.