Tamyz aıynyń alǵashqy kúnderinde Bilim jáne ǵylym mınıstrliginiń qoldaýymen Abaı atyndaǵy Qazaq ulttyq pedagogıkalyq ýnıversıtetinde respýblıka oblystary men Almaty, Astana, Shymkent qalalary bilim basqarmalarynyń basshylarymen ótkizilgen semınar aldaǵy tamyz keńesinde qaralatyn máselelerge tyń serpin beretini sózsiz.
Semınardyń negizgi taqyryby «Álemdik ózgerister jaǵdaıynda bilim berý uıymdaryn basqarý» dep atalǵanymen, kóterilgen jáne talqylanǵan máselelerdiń aıasy aýqymdy. О́ıtkeni joǵary oqý oryndarynda sapaly muǵalim kadrlaryn daıarlaý, bul mamandyqqa oqýǵa túsetin jastardy ıkemine qaraı irikteý, olarǵa tereń bilim berý, muǵalim mártebesin kóterý, bilim berý mazmunyn jańartý, orta bilim berýdi damytý, adamnyń damýyna jáne áleýmettenýine qolaıly adamgershilik jáne qaýipsiz ortany qurý, elimizde bilim berý júıesiniń kásiptik baǵdarlanýyn qaıta júkteý, bilim berý uıymdarynda kámeletke tolmaǵandardyń ózine-ózi qol jumsaýy (sýısıd) minez-qulqynyń aldyn alý, bilimdi krıterıaldyq baǵalaý, monıtornıg júıesinde sapany baqylaý quraldaryn (TQM) paıdalaný, mektepte bilim berý sapasyn qamtamasyz etýde aýdandyq ádistemelik kabınetterdiń rólin arttyrý sııaqty ózekti máseleler jan-jaqty talqylandy.
Semınardyń bas moderatory, ýnıversıtet rektory, pedagogıka ǵylymdarynyń doktory, professor Takır Balyqbaev oqý ornynyń aldaǵy qazan aıynda ótkiziletin 90 jyldyq mereıtoıy jáne ony ótkizýge daıyndyq barysy týraly habarlaı kelip, joǵary oqý oryndarynda muǵalim kadrlaryn daıarlaýdyń negizgi ózekti máselelerine toqtaldy.
«Nazarbaev zııatkerlik mektepteri» DBBU basqarma tóraıymy Kúlásh Shámshıdınova bilim berý mazmunyn jańartýdyń ózekti máselelerine, bul salada ózi basqaryp otyrǵan uıymnyń atqaryp otyrǵan jumystaryna toqtaldy. «О́rleý» muǵalimderdiń biliktiligin jetildirý ulttyq ortalyǵy basqarmasy tóraǵasynyń orynbasary Isa Samsaev mektepte bilim berýdiń jańa mazmunyn engizýge baılanysty muǵalimder daıarlaýdyń mańyzy týraly, Almaty menedjment ýnıversıtetiniń prezıdenti Asylbek Qojahmetov orta bilim berýdi damytýdyń joldary, P «Arsana» respýblıkalyq qoǵamdyq birlestiginiń tóraıymy Rysty Jumabaeva adamnyń damýyna qaýipsiz orta qurý, EDTECH halyqaralyq bilim berý ortalyǵynyń bas dırektory Ǵanı Beısembaev kásiptik baǵdar berý máseleleri, Abaı atyndaǵy QazUPÝ biliktilikti arttyrý ortalyǵy dırektorynyń orynbasary Aleksandr Semchenko ǵalamdyq ózgermeli kezeńdegi bilim berý máseleleri týraly óte mazmundy baıandamalar jasady. Pedagogıka ǵylymdarynyń doktory, professor Kúlzada Qudaıbergenovanyń «Krıterıaldy baǵalaý» týraly, «О́rleý» ulttyq ortalyǵy dırektorynyń orynbasary Ásel Tańatovanyń bilim berý uıymdarynda kámeletke tolmaǵandardyń ózine-ózi qol jumsaý áreketteriniń aldyn alý taqyrybyndaǵy baıandamalary kópshiliktiń kóńilinen shyqty.
Talqylanǵan máseleler boıynsha joǵary oqý oryndarynyń oqytý baǵdarlamalaryna «Nazarbaev zııatkerlik mektepteri» qoldanyp otyrǵan tehnologııalardy batyl engizý, bilim berý boıynsha ǵylymı-praktıkalyq baǵdarlanǵan zertteýler júrgizý, pedagogıkalyq praktıkanyń merzimin uzartý jáne ony stýdentterdiń turǵylyqty jeri boıynsha ekinshi kýrstan bastap ótkizý, 9 synyp oqýshylary arasynda kásiptik baǵdar berýdi uıymdastyrýǵa EDTECH halyqaralyq bilim berý ortalyǵynyń mamandaryn tartý, elimizdiń aımaqtarynda muǵalimderdiń pedagogıkalyq tájirıbe almasý alańdaryn qurý, JOO professor-oqytýshylarynyń bazalyq bilim berý uıymdaryndaǵy jumysyn kúsheıtý sııaqty ózekti usynystar qabyldandy.
Joǵary oqý ornyna muǵalimdik mamandyqty jan-tánimen súıetin, ony ómirlik maqsatyna aınaldyrǵan shynaıy talapkerlerdiń maqsatty toptaryn iriktep qabyldaý aımaqtardy joǵary mamandandyrylǵan pedagogıkalyq kadrlarmen qamtamasyz etý maqsatynda «Bilim berý alıansy» konsorsıýmy quryldy. Osyǵan baılanysty «EDTECH. Kz» halyqaralyq bilim berý ortalyǵy, Abaı atyndaǵy Qazaq ulttyq pedagogıkalyq ýnıversıteti jáne oblystardyń, Almaty, Astana, Shymkent qalalarynyń Bilim basqarmalary arasynda memorandýmǵa qol qoıyldy.
Semınarǵa qatysqan óńirlik bilim basqarmalarynyń basshylary bul jıynnyń taıaýdaǵy tamyz keńesi qarsańynda oıǵa-oı qosyp, aldaǵy isterine tyń serpin beretinin aıtty.
Bul jıynnyń Abaı atyndaǵy Qazaq ulttyq pedagogıkalyq ýnıversıtetiniń Qapshaǵaı teńizi jaǵasyndaǵy «Ustaz» demalys aımaǵynda ótkizilýi tamyzdyń mı qaınatqan aptap ystyǵynda oǵan qatysýshylar men qonaqtardyń ári demalyp, ári sergek jumys isteýine múmkindik berdi.
Myrzahan AHMETOV,
Abaı atyndaǵy Qazaq ulttyq pedagogıkalyq
ýnıversıteti qoǵammen baılanys jónindegi bóliminiń basshysy