Sh.Aımanov atyndaǵy «Qazaqfılm» kınostýdııasyna Túrkııanyń «TRT» teleradıokompanııasy Astanadaǵy ókildiginiń dırektory Abdýlhamıt Avshar keldi. Kezdesýde korporasııa basshylyǵy atynan kınostýdııanyń kartınalaryn túrik telearnasynda kórsetý maqsatynda alýǵa nıetti ekenin bildirdi.
«TRT» teleradıokorporasııasy – birneshe radıostansalardyń negizinde 1964 jyly qurylǵan. Búgingi tańda korporasııaǵa ondaǵan halyqaralyq jáne aımaqtyq tele jáne radıoarnalar kiredi. Kóptegen elderde ókildigi bar korporasııanyń bólimshesi Qazaqstanda da ashylǵan.
– Bizdiń korporasııaǵa tıesili «TRT Avaz» telearnasynda aptasyna bir ret túrkitildes elderdiń kınolaryn kórsetýdi josparlap otyrmyz. Osy oraıda, biz «Qazaqfılmge» kelip, shyǵarmashylyq baılanys jasaýdy usyndyq. О́ıtkeni bul kınostýdııa Qazaqstandaǵy basty jáne túrli janrdaǵy sapaly kıno óndirýshi stýdııa. Búgingi bizdiń maqsatymyz sizderdiń fılmderińizben tanysyp, qazaq halqynyń tarıhy men mádenıetin kórsetetin týyndylardy tańdap alý, – dedi kezdesý barysynda Abdýlhamıt Avshar.
О́z kezeginde «Qazaqfılm» kınostýdııasynyń aýdıovızýaldy jobalar basshysy Oljabaı Musabekov kınostýdııa óndirgen fılmder katologyn berýge daıyn ekenin jetkizdi.
– 2009 jylǵa deıin túsirilgen fılmder taspada saqtalǵan. Alaıda Qazaq ǵylymı-zertteý mádenıet ınstıtýtynyń kómegimen sandyq júıege engizdik. Eski jáne jańa fılmderdi sizderge qajetti formatta berýge daıynbyz.
Kezdesý barysynda túrkııalyq qonaqqa kınostýdııa boıynsha ekskýrsııa júrgizilip, «Qazaqfılmniń» kınoóndiristik múmkindigi men tehnıkalyq jabdyǵy tanystyryldy.
Túrik teleradıokompanııasy nemese Túrik radıo jáne televızııasy qory (túr. Türkiye Radyo Televizyon Kurumu), sondaı-aq, TRT – túrik memlekettik teleradıokompanııasy retinde de tanymal. Atalmysh korporasııaǵa ondaǵan salalyq telearna jáne birneshe aımaqtyq, halyqaralyq radıostansalar kiredi. Búgingi tańda TRT álemniń 30 tilinde habar taratady. TRT – Eýropalyq habarlaý keńesiniń múshesi jáne Euronews aksıoneri.
Aıgúl AHANBAIQYZY,
«Egemen Qazaqstan»