Qazaqstan Ulttyq Banki «Qazaqstan Respýblıkasynyń keıbir zańnamalyq aktilerine saqtandyrý jáne saqtandyrý qyzmeti, baǵaly qaǵazdar naryǵy máseleleri boıynsha ózgerister men tolyqtyrýlar engizý týraly» 2018 jylǵy 2 shildedegi № 166-VI Qazaqstan Respýblıkasynyń Zańymen onlaın-saqtandyrýǵa jáne elektrondyq nysandaǵy saqtandyrý polısiniń zańdylyǵyn bekitýge qatysty zańnamalyq túzetýler engizilgenin habarlaıdy.
2019 jylǵy 1 qańtardan bastap saqtandyrý uıymdarynyń klıentteri saqtandyrý sharttaryn ınternet-resýrstardy paıdalana otyryp, elektrondyq nysanda jasasyp, saqtandyrý polısin elektrondyq nysanda resimdeı alady. Sharttyń elektrondyq nysany mindetti saqtandyrýdyń barlyq túrleri boıynsha engiziledi.
«Onlaın-saqtandyrý engizilgennen bastap mindetti saqtandyrý sharttary boıynsha qaǵazdaǵy polısterdiń aınalysy joıylady. Saqtandyrý shartyn jasasý faktisi saqtandyrý boıynsha biryńǵaı derekqorǵa suratý jiberý arqyly tekseriledi. Avtokólik ıeleriniń ákimshilik polısııanyń qyzmetkerlerine saqtandyrý polısin usynýy qajet emes. Onlaın-saqtandyrýdy engizý halyq pen bıznes úshin saqtandyrýdyń qunyn arzandatýǵa, sharttardy ofıske barmaı-aq nemese deldaldardyń qatysýynsyz saqtandyrý kompanııalarynyń ınternet-resýrstary arqyly tikeleý jasasý múmkindigin beredi, sondaı-aq saqtandyrý tólemderin alýdy jedeldetedi», delingen baspasóz habarlamasynda.
Saqtandyrý kompanııalary kólik quraldary ıeleriniń azamattyq-quqyqtyq jaýapkershiligin mindetti saqtandyrý sharttaryn elektrondyq nysanda jasasý kezinde 10%-ǵa deıin jeńildik berýge quqyly.