Ánýar Kúmpekeev Pavlodar qalasynyń ákimi laýazymyna taǵaıyndaldy.
«Oblys ortalyǵynyń jańa ákimin óńir basshysy Bolat Baqaýov tanystyrdy. Ol Pavlodardyń jańa basshysynyń kandıdatýrasyna Prezıdent Ákimshiligi men qalalyq máslıhat depýtattary kelisim bergenin aıtty», dep málimdedi Pavlodar oblysy ákimdiginiń baspasóz qyzmeti.
Ánýar Kúmpekeev 1984 jyly Pavlodarda dúnıege kelgen. 2005 jyly M.V. Lomonosov atyndaǵy Máskeý memlekettik ýnıversıtetin ekonomıka mamandyǵy boıynsha bitirip, 2007 jyly Ulybrıtanııanyń Bredford ýnıversıtetinde ekonomıkalyq saıasat baǵytynda magıstr dárejesin aldy, 2016 jyly Sh. Ýálıhanov atyndaǵy Kókshetaý memlekettik ýnıversıtetin támamdady.
Á. Kúmpekeev - Qazaqstan Respýblıkasy Prezıdentiniń «Bolashaq» halyqaralyq stıpendııasynyń bitirýshisi. Ár jyldary Qazaqstan Respýblıkasy Densaýlyq saqtaý mınıstrliginiń ekonomıka jáne qarjy departamentiniń jetekshi mamany, aǵa mamany boldy, «QR Ulttyq bıotehnologııalar ortalyǵy» RMK marketıng jáne kommersııalandyrý, strategııalyq damý departamentteriniń dırektory laýazymyn atqardy, «Qazaqstan TKSh jańǵyrtý jáne damytý ortalyǵy» AQ ǵylymı-tehnıkalyq saıasat jáne normalandyrý departamentiniń dırektory, aksıonerlik qoǵamnyń atqarýshy dırektory qyzmetterin atqardy. 2012 jyldan 2015 jylǵa deıin Aqmola oblysy Stepnogor qalasy ákiminiń orynbasary bolyp, 2015 jyldyń mamyrynda qala ákimi laýazymyna taǵaıyndaldy.