Aımaqtyq forým tıimdiligin kórsetti

Aımaqtyq forýmda iri bastaýysh partııa uıymdarynyń tóraǵalary men Astana, Almaty qalalarynyń, Qostanaı jáne Qaraǵandy oblystaryndaǵy aýmaqtyq fılıaldar tóraǵalarynyń birinshi orynbasarlary qatysty.

Forým jumysy 4 seksııa boıynsha júrgizildi. Birinshi seksııada partııa hatshysy Tamara Dúısenovanyń qatysýymen bastaýysh partııa uıymdarynyń belsendiligin arttyrý tujyrymdamasy talqylandy. Qatysýshylarǵa partııanyń barlyq qyzmetin sıfrlandyrýǵa, partııa músheleriniń biryńǵaı bazasyn quryp, qujat aınalymyn azaıtýǵa jáne partııa qyzmetiniń tıimdiligin arttyrýǵa baǵyttalǵan «Sıfrly partııa» jobasy tanystyryldy.

Ekinshi seksııada qatysýshylar partııalyq bilim berý júıesin, BPU men partııa músheleri qyzmetin belsendi etý tujyrymdamasyn taldady. Úshinshi seksııada partııanyń ıdeologııalyq jobalary, sıfrlandyrý, halyqtyń sandyq saýatyn arttyrý, bıznestiń geoaqparattyq onlaın-servısi, kishi jáne orta bıznesti damytý, memlekettik jastar saıasaty, «Rýhanı jańǵyrý», t.b. baǵdarlamalardy qoldaý jáne júzege asyrýǵa baǵyttalǵan partııalyq 22 jańa jobany júzege asyrý boıynsha jumys formalary men ádister talqylandy.

«Jańa jobalar – birkúndik aksııa nemese keńselik shara­lar emes. Partııa músheleriniń qyzmeti nátıjesinde qazaq­stan­dyq­tardyń ómiri men turmysy jaqsarýy tıis», dedi T.Dúıse­nova.

Tórtinshi seksııa jumysy adamı resýrstardy basqarý men partııanyń kadrlyq rezervin qalyptastyrý máselesine, bas­taýysh partııa uıymdary men partııa músheleriniń derekter bazasyn belsendi etý, bastaýysh partııa uıymdaryn yntalandyrý men jetildirý úshin baǵalaý júıesin engizýge arnaldy.

Aımaqtyq forýmnyń qatysýshylary úshin «Nur Otan» partııasynyń ortalyq apparatynyń qurylymdyq bólinisteriniń jetekshileri, partııanyń saıası menedjment akademııasynyń oqytýshylary, tanymal trenerler men saıasatkerler ártúrli bastaýysh partııa uıymdarynyń ókilderine arnap «Sheshendik óner», «Saıası kommýnıkasııa» jáne t.b. taqyryptar boıynsha trenıngiler ótkizdi.

Qaırat ÁBILDA,

«Egemen Qazaqstan»

QARAǴANDY