Jańa oqýlyqtarda – QR-kod
Taıaý kúnderde Qazaqstandaǵy myńdaǵan mektepte qońyraý soǵylyp, jańa oqý jyly shákirtterge jarqyn shabyt syılaıdy. Oqý jyly bastalǵanǵa deıin oqýshylarǵa oqýlyqtardy jetkizý úderisi kelisimsharttar boıynsha bekitilgen merzim aralyǵynda iske asyrylýy kerek. Iаǵnı oqýlyqtar men oqý-ádistemelik keshenderin bilim berý uıymdaryna jetkizý jumystary aǵymdaǵy jyldyń 25 tamyzyna deıin tasymaldanyp bitýi kerek bolatyn. Bul máseleni mınıstrlik basty nazarda ustap, kúndelikti monıtorıng júrgizip otyr. Desek te birqatar óńirde tasymaldaýshylardyń óz mindetterin durys oryndamaýyna baılanysty oqýlyqtardyń ýaqtyly jetkizilmeýi baıqaldy.
Bilim jáne ǵylym mınıstri Erlan Saǵadıevtiń aıtýynsha, Aqmola oblysynyń 6 aýdany, Qostanaı oblysynyń 3 aýdany, Shyǵys Qazaqstan oblysynyń 2 aýdany, Qyzylorda oblysynyń 1 aýdany oqýlyqtardy óz kúshimen tasymaldaýǵa májbúr. Bul jumystar boıynsha Jambyl, Túrkistan, Batys Qazaqstan, Qaraǵandy, Soltústik Qazaqstan oblystary men Shymkent qalasy oqýlyqtarmen tolyq qamtylǵan. Jalpy, bıylǵy oqýlyqtardyń ótken jyldardaǵy oqýlyqtardan aıyrmashylyǵy – onyń elektrondy nusqalaryna qoljetimdiligin qamtamasyz etý úshin QR-kod ornalastyrylýynda desek bolady.
Mınıstrliktiń baspasóz qyzmetiniń habarlaýynsha, respýblıka boıynsha orta eseppen baspalardan óńirlerge oqýlyqtardyń 98,2%-i jóneltilgen, 92,5%-i bilim berý nysandaryna jetkizilgen. Baspalardan shyqqan kitaptardyń sapasyna keler bolsaq, formaty men salmaǵyna qoıylatyn talaptar oryndalǵan.
«Jalpy respýblıka boıynsha 2018-2019 oqý jylyna jańartylǵan bilim mazmunyna kóshetin 3, 6 jáne 8-synyptarǵa arnalǵan 12 mln-nan astam oqýlyq satyp alyndy. 3, 6, 8-synyp oqýshylaryna oqýlyqtar satyp alý úshin 28,6 mln teńge bólingen. Atalǵan synyptardaǵy oqýshylar sany – 906 myń. Qazirgi kezde barlyq bilim berý sýbektileri oqý ádebıetin jetkizý máselelerimen belsendi túrde aınalysýda. Oqýlyqtardy jóneltý jáne jetkizý prosesi óńir ákimdikteri men bilim basqarmalary basshylarynyń qatań baqylaýynda», deıdi E.Saǵadıev.
72 jańa mektep paıdalanýǵa beriledi
Elimizdegi demografııalyq jáne mıgrasııalyq jaǵdaılarǵa baılanysty óńirlerdegi keıbir mektepter áli kúnge deıin úsh aýysymda oqýǵa májbúr. Bul jaǵdaı halyqtyń jyl saıyn elimizdiń megapolısterine kóptep aǵylýyna baılanysty iri qalalarda oryn alýda. Aıtalyq, byltyr Astananyń ózine 17 myńnan astam bala kelgen. Iаǵnı bul Astanada ótken jyl úshin keminde qosymsha 15 mektep salý kerek degendi bildiredi. Bilim jáne ǵylym vıse-mınıstri Ashat Aımaǵambetov atap ótkendeı, úsh aýysymdy mektep máselesi bir sátte sheshilmeıdi.
«Biz mektepter salyp jatyrmyz. Tek bıyldyń ózinde respýblıkalyq bıýdjet esebinen 110 mektep qurylysy júrgizilýde. Jyl sońyna deıin 72 jańa mektepti paıdalanýǵa beremiz dep kózdep otyrmyz» deıdi A.Aımaǵambetov.
Vıse-mınıstrdiń aıtýynsha, jyl saıyn elimizde respýblıkalyq bıýdjet esebinen 100-den astam mekteptiń salynatynyna qaramastan, másele tolyq sheshilmeı otyr. Qazaqstanda áli kúnge deıin úsh aýysymdyq, apatty mektepter bar. Osyǵan baılanysty elimizde jan basyna shaqqandaǵy qarjylandyrýdy engizýdi qoldaý máselesi óte ózekti. Jan basyna shaqqandaǵy qarjylandyrý jeke sektordy jańa mektepter salyp, ashýǵa yntalandyrady. Búginde qanatqaqty joba bastalyp, jekemenshik mektepterdiń ashylyp jatqanyn kórýge bolady. Sondaı-aq atalǵan joba negizinde Qazaqstanda mektepke deıingi mekemelerdi salýdyń oń tájirıbesi júzege aspaq.
«Birneshe jyl buryn mektepke deıingi bilimmen qamtý elimizde nebári 60% edi, qazir – 93%. Buǵan jeke sektordy tartý esebinen qol jetkizildi. Memleket basshysy «Balapan» baǵdarlamasyna bastama bildirdi. Memlekettik – jekemenshik áriptestik jumysy jandandy. Máselen, bıylǵy 7 aı ishinde engizilgen 40 myń orynnyń 30 myńy jeke kompanııalardiki» dedi vıse-mınıstr.
Sonymen qatar aldaǵy ýaqytta jekemenshik mektepterde memleket memlekettik tapsyrysty ornalastyratyn bolady. Mınıstrliktiń baspasóz qyzmetiniń habarlaýynsha, búgingi tańda elimiz boıynsha muǵalimder sanynyń jetkilikti ekeni aıtylǵan. Pedagogtardy daıarlaý sapasyna erekshe kóńil bólinip otyr. Qazir elimizdegi ustazdar sany – 285 myń adam. Jyl saıyn ýnıversıtetterde 35 myń adam pedagog mamandyǵyn alyp shyǵady. Aǵymdaǵy jyly memlekettik bilim grantymen oqyǵan 6 myń maman oqý bitirgen.
Mıras ASAN,
«Egemen Qazaqstan»