Djakartada ótip jatqan Azııa oıyndarynyń toǵyzynshy kúni elimizdiń qorjyny eki júldemen tolyqty. Kórkem gımnastshy Alına Ádilhanova jekeleı synda altyn júlde enshilese, sınhrondy júzý sportynyń ókili apaly-sińilili Nemıchter Azıadanyń qola júldegeri atandy.
Kórkem gımnastıkadan komandalyq jarysta altyn júlde jeńip alǵan qazaqstandyq sportshy Alına Ádilhanova keshegi jarys kúninde jekeleı synda da top jaryp, Azııa oıyndarynyń eki dúrkin chempıony atandy. Alına jekeleı synda jalpy sany 66.800 upaı jınap, altyn medal ıelendi. Kúmis júlde О́zbekstan arýy Sábına Tashkenbaevaǵa (65,850 upaı) buıyrsa, 65,500 upaı jınaǵan qytaı ókili Iаtıng Jao qola júldeni qanaǵat tutty.
Sondaı-aq bul synda Alınamen birge komandalyq esepte jeńiske jetken Adılıa Tlekenova da qatysqan bolatyn. О́kinishke qaraı, ol 57,250 ball toptap, 24 sportshynyń arasynan 10-oryn ıelendi.
Kórkem gımnastıkadan Qazaqstan ulttyq qurama komandasynyń bas bapkeri Álııa Iýsýpova gımnasshy Alına Ádilhanovanyń kópsaıystaǵy jeńisine qatysty Ulttyq Olımpıada komıtetiniń baspasóz qyzmetine bergen suhbatynda búgingi báseke keshegige qaraǵanda jaýapkershilik júgi óte aýyr boldy deıdi. «Birinshi saıystan keıin Alına ekinshi orynda turǵanda ol da, men de qatty qobaljydyq. Degenmen, oǵan daýys kóterip, kóńil kúıin túsirgim kelmedi. Sebebi qyzymyzdyń áli eki saıysy baryn, onyń ózi kóp nárse sheshetinin túsindim. Sondyqtan «ne isteý kerektigin bilesiń, qolyńnan ne keledi, sony iste. Sen jarysty bastadyń, endi sheginerge jol joq» dep aqylymdy aıttym. Ol aıtqanymdy eki etpeı, tapsyrmany múdirmeı oryndap shyqty. Balalar úshin eki kún qatarynan osyndaı salmaqty jarysqa jaýapkershilikpen qatysý óte qıynǵa soǵady. Ásirese búgingi jarys kúni jaýapkershilik jaǵynan óte aýyr kún boldy», deıdi Álııa Iýsýpova.
Azııa oıyndaryndaǵy kezekti qola medaldi sınhrondy júzýshi sportshylarymyz jeńip aldy. Juptasyp óner kórsetýde synǵa túsken Ekaterına men Aleksandra Nemıch jarys qorytyndysy boıynsha úzdik úshtikke endi. Nemıchter jalpy esebi 170.8845 upaı jınady. Al altyn medal alǵan qytaılyq sportshylar 186.5101, kúmis júldeger atanǵan Japonııa komandasynyń qyzdary 182.3363 upaı ıelendi.
Osylaısha Azııa oıyndarynyń toǵyzynshy kúni elimizdiń qorjynyna bir altyn, bir qola júlde tústi. Ázirshe jeńil atletterimizge eki qoladan basqa medal buıyrmaı tur. Al boksshylarymyz bir júldeni naqtylap qoıdy. 69 kıloda judyryqtasatyn otandasymyz Aslanbek Shymbergenov keshe qyrǵyzstandyq Ábdirahman Ábdirahmanovty upaı sanymen jeńip, jartylaı fınalǵa shyqty. Iаǵnı, qorjynda keminde qola júlde bar degen sóz. Degenmen, Olımpııa oıyndarynda «qazaqtyń salmaǵy» sanalyp ketken 69 kılonyń júgin arqalap júrgen Aslanbekten tek altyn medal kútemiz.
Al búginnen bastap dzıýdoshylarymyz jarys jolyna shyǵady. Otandastarymyzdan alǵash bolyp tatamıge Eldos Smetov (60 kg), Eldos Jumaqanov (66 kg), Otgonseseg Galbadrah (48 kg) jáne Kamshat Qarasaıqyzy (52 kg) shyǵady. Inchhon (2014 jyl) Azıadasynda dzıýdoshylar 1 altyn, 1 kúmis, 3 qola medal jeńip alǵan. Dzıýdodan Qazaqstan erler ulttyq qurama komandasynyń bas bapkeri Aıdyn Smaǵulov bıylǵy Azııa oıyndarynda 1 altyn, 1 kúmis, 1 qola júldeni josparlap otyrmyz, dep aıtqan bolatyn.
Álı BITО́RE,
«Egemen Qazaqstan»