Bul kúnderi Reseıdiń Elısta qalasynda ótip jatqan stýdentter arasyndaǵy álem birinshiliginiń fınalynda Qazaqstannyń qos boksshysy joldama aldy. Olar – aqtóbelik Abaı Qýandyqov pen atyraýlyq Bekbolat Quramysov.
52 keli keli salmaq dárejesinde baq synaǵan Abaı Qýandyqov jartylaı fınalda Japonııanyń ókili Nagakakı Rıýýatorny utty. Endi ol aqtyq synda Nıen Shın Shenmen kezdesedi. Taıpeılik boksshy óz kezeginde ırlandııalyq Nesbıt Rıkkıden aılasyn asyrdy. 69 kılo salmaqtaǵy Bekbolat Quramysov dál osy mejede polshalyq Vashala Fılıpke adym ashtyrmaı, kúmánsiz jeńiske jetti. Fınalda ol da Taıpeıden kelgen bylǵary qolǵap sheberimen sheberlik baıqasady. Araldyq eldiń ókili jartylaı fınalda oıda-joqta jergilikti boksshy Ákim Nabıýlınge san soqtyryp ketti. Al 60 kılo salmaqtaǵy Erjan Ordabaev Reseı chempıony, Eýropa chempıonatynyń kúmis júldegeri Gabıl Mámedovqa ese jiberip, qola medaldi qanaǵat tutty.
Bir aıta keteriligi, Abaı Qýandyqov úshin Elıstadaǵy doda stýdentter arasyndaǵy alǵashqy synaq bolsa, Bekbolat Quramysov buǵan deıin de talaı dúbirli dúrmekte óner kórsetken. Atap aıtar bolsaq, elimizge eńbek sińirgen jattyqtyrýshy Dastan Sádýaqasovtyń shákirti 2016 jylǵy Dýshanbedegi Azııa birinshiliginde qola medaldi ıelense, Chıang-Maıdaǵy álem chempıonatynda kúmis júldeni oljalaǵan.
Ǵalym SÚLEIMEN,
«Egemen Qazaqstan»