Shyńjandaǵy Qutybı aýdany ortalyǵynyń batys ońtústiginde, 75 shaqyrym qashyqtyqtaǵy Táńirtaýda óte kóp jartas sýretteri kezdesedi. Onyń ǵajaıyptyǵy da sonda, bıshilerdiń býyndaryn syrtyldatyp, órnekti ónerdi tógiltip jatqanyn kóz aldyńyzǵa ákeledi.
Jaqynda ǵana Almatyda «An Arys» baspasy shyǵarǵan Sálıma Orazqyzynyń «Qazaq bı óneriniń negizderi» degen Qytaı Halyq Respýblıkasyndaǵy Shyńjannyń bı óneri salasyna eren eńbek sińirip, ár ult ókilderinen qanshama talantty shákirtter tárbıelegen kásibı bıshiniń súbeli eńbeginde bıge qatysty qyzyqty dúnıeler bar.
Kitapta: «Shyńjannyń Qutybı aýdany ortalyǵynyń batys ońtústiginde, 75 shaqyrym qashyqtyqta óte kóp jartas sýretteri bar. Jasyl alqap ishinde qyzyl tústegi tastarǵa oıylǵan bul sýretterde 200-300-deı adamnyń obrazy jáne bılep turǵan kórinis oıylǵan. Bul jartas sýretteriniń qashan oıylǵany belgisiz bolsa da, sýrettegi áıelderdiń basyndaǵy qos múıizderi munan shamamen 6 myń jyl buryn ómir súrgen qos múıizdi ǵuryptardy eske túsiredi. Keıbir zertteýler bul jartas sýretteriniń oıylǵan ýaqytyn munan 4 myń buryn dep shamalaıdy» dep, kánigi bı sańlaǵy kórgen-bilgenderin qaǵazǵa túsire otyryp, tańdanysyn bildiredi. Ǵajap dersiz, bı óneriniń tylsym syrlary bádizdelýi sol kezeńniń ózinde qyzǵylt jartastarda oımyshtalyp, órnektelip jetýi túrli oılarǵa alyp barar edi.
Qyzǵylt jartastaǵy bıshilerdiń kerim keıpi kerbez oımyshtalǵan, kózińizge keremet keıpin elestetedi. Jaryqtyq jartas janaryńdy ózine tartyp, ón boıyńdy ystyq sezimmen aıryqsha aıalap, Táńirtaýdy terbete túskendeı. Tas betindegi oımyshtalǵan bederler bılep júrgen qyzdardyń keıpin kóz aldyńyzǵa ákeledi. Býyndary syrtyldap, yrǵaqtarmen oı tastap bara jatqandaı elesteıdi. Shımaı syzyqtar aıqysh-uıqysh bolyp óreli ónerdiń sán-saltanatyn aıqara ashqandaı bolady. Shyn máninde, qońyr áýen keletindeı, tym shalǵaıdan shyǵystyń buıra tolqyndary jetkendeı bolady, syrnaılatyp sazdy áýez eliktirip shadyman kúıge túsiredi. Kánigi bıshiniń kitaby úlken, syrbaz óner jolynan jastarǵa sabaq, ári baıqampaz jandarǵa derekti dúnıeni aıtyp otyr. Jan-dúnıeńdi tolqytyp, delebeńdi qozdyryp, seni de óz qatarlaryna shaqyrǵandaı. Myna tastaǵy tańbalardy búgingi kúnderge kim qaldyrdy eken?
En daladaǵy shyrqaý shyńnyń tasasynda kún men tún qatyp tas órnektegen bádizshiniń tershigen mańdaıyn kústengen alaqanymen bir tartyp qoıyp, nebir qııaldarǵa berilgen boldy dep endi biz oıǵa berilip otyrmyz. Táńirtaýda jartasty bádizdegen has sheber órgen órimder...
Sizge de tańsyq shyǵar.
Kóz aldymda Táńirtaýdy tamsandyrǵan tanys bı...
Saparbaı PARMANQUL,
«Egemen Qazaqstan»
ALMATY