Keshe redaksııamyzǵa Astanada jeke turǵyndarǵa kómir jetpeı, bar kómirdiń ózi tonnasy 20 myń teńgeden satylyp jatqany týraly habar kelip tústi. Bul shaǵymdy estigennen keıin kómir satylatyn oryndarǵa baryp, qalyptasqan jaǵdaıdy kózben kórgendi jón kórdik.
Jalpy, Astanada kómir satatyn núkteler kóp emes. Biz biletin, buǵan deıin ákimdik habarlaǵan 6 oryn bar edi. Sonyń biri Jubanov kóshesi boıyndaǵy 25 úı meken jaıynda avtokólik joly da, temir jol da tuıyqtalatyn jer. Shyny kerek, Jubanov kóshesindegi tuıyqqa kelgenimizde topyrlap kezek kútken halyqty kórmedik. Kómir tıeıtin jerge kiretin tustaǵy qaqpany kúzetip turǵan jigittiń aıtýynsha, tańerteńnen túske deıin topyrlap kezek kútken jurt tús aýa tarap ketipti. Sebep – kómir taýsylǵan.
– Kómir alǵyńyz kelse erteń erterek kelińiz, tańǵy jetiden bastap kezek kóbeıedi. Túske deıin alyp úlgermeseńiz, saǵat 13-00-ge qaraı taýsylyp qalady,– dedi kúzetshi jigit.
Aıtýynsha, bul orynǵa kún saıyn birneshe vagon kómir keledi eken. Halyq eń kóp tutynatyn, jaqsy janatyn, qyzýy kúshti Shubarkól kómiriniń tonnasy 13 500 teńgeden satylady. Kómir alatyn adam alakeýimnen qımyldaýy kerek ekenin túsindik.
Mán-jaıdy bilmek bolyp, qalalyq ákimdiktiń baspasóz qyzmetine habarlastyq. Baspasóz qyzmetiniń habaryna sensek, dál qazir kómir tapshy dep dabyl qaǵýǵa sebep joq kórinedi.
– 18 qyrkúıektegi jaǵdaı boıynsha kómir satylatyn jerlerdegi jalpy qor 7329,75 tonnany quraıdy. Astana qalasynyń otyn-energetıkalyq kesheni jáne kommýnaldyq sharýashylyq basqarmasy baǵa ósiminiń aldyn alý úshin kómir satýshylarmen memorandýmdarǵa qol qoıdy, – dep habarlady baspasóz qyzmeti.
Elordaǵa tamyzdan beri 52,2 myń tonna kómir jetkizilipti. Bul byltyrǵy kórsetkishten eki jarym esege artyq. Degenmen, kómir satylatyn jerlerdegi topyrlaǵan kezekti de ákimdik joqqa shyǵarǵan joq. Ony:
– Kómir ónimin jetkizýde kezektiń paıda bolýy baıqalady. Satý núktelerindegi kezek treıderlerdiń kómirdi ýaqtyly jetkizbeýinen týyndaıdy, – dep túsindirdi.
Baǵaǵa baılanysty da baıbalam salýdyń jóni joq sııaqty. Shubarkól kómiriniń tonnasy – 13 500-14 500 teńgeden, «Qarajyra» – 14 000 teńgeden, «Maıkúbi» – 12 000-12 500 teńge, Bogatyr kómiriniń tonnasy – 8500-9500 teńgege satylyp jatyr eken. Ákimdiktiń jaýaby osyndaı. Bul bizdiń estigen deregimizben de úılesedi.
Astananyń burynǵy ákimi Áset Isekeshev tamyzdyń aıaǵynda halyqty erterek kómir satyp alýǵa shaqyrǵany esimizde. Ol 200 myń tonnadan artyq kómir, 6 myń tonnadan artyq mazýt daıyn ekenin, qatty otyn JES-terge de, jeke úılerge de jetetinin aıtqan bolatyn.
Arnur ASQAR, «Egemen Qazaqstan»