Astanada Qoǵamdyq damý mınıstrligi Qoǵamdyq kelisim komıtetiniń uıymdastyrýymen «Dinı ekstremızm men terrorızmniń aldyn alý máselelerindegi qoǵamdyq ınstıtýttardyń róli» taqyrybynda respýblıkalyq konferensııa ótti.
Alqaly jıynnyń basty maqsaty – mınıstrliktiń dinı ekstremızm men terrorızm kórinisteriniń aldyn alý máseleleri boıynsha úkimettik emes uıymdarmen, onyń ishinde qoǵammen ózara is-qımyldy jetildirý. Oǵan Qoǵamdyq damý vıse-mınıstri Berik Aryn, dinı birlestikter, múddeli memlekettik organdar, destrýktıvti dinı aǵymdardan zardap shekken tulǵalarmen aldyn alý jáne ońaltý salasynda qyzmet etetin úkimettik emes uıymdar, mádenıet jáne sport salasyndaǵy qoǵamdyq, jastar uıymdarynyń jáne joǵary oqý oryndarynyń ókilderi qatysty.
Konferensııa barysynda azamattardyń, onyń ishinde jastardyń destrýktıvti dinı aǵymǵa tartylý sebepteri men mehanızmderi qarastyrylyp, teris aǵymdardyń sıpaty jáne basqa da máseleler kóterildi.
Búgingi tańda dinı ekstremızm men terrorızmniń aldyn alý máselelerinde qoǵamdyq ınstıtýttardyń róli óte mańyzdy. Sol sebepti Qoǵamdyq damý mınıstrligi qoǵamdyq ınstıtýttarmen birlese otyryp, jıi pikir almasyp, saýatty suhbat quryp turady. Bul joly da sol dástúrden jańylmaı, qoǵam pikir tyńdalyp, ortaq úndes sharalar, usynystar talqylandy. «Kez kelgen jat dinı aǵym, lańkestik jáne basqa da dinı máseleler ózdiginen paıda bolmaıdy, olardyń astarynda úlken áleýmettik-qoǵamdyq máseleler, otbasyndaǵy tárbıe máseleleri bar. Osy rette memleket bul máseleni ózdigimen sheshe almaıdy. Sondyqtan osy problemalardyń aldyn alý, sheshý úshin qoǵam bolyp jumylyp, belsendi jumys atqarýymyz qajet. Qazirdiń ózinde dinı ekstremızm men lańkestiktiń aldyn alý maqsatynda Qoǵamdyq damý mınıstrligi 29 úkimettik emes uıymmen birlese jumys atqarady. Olar túrli sala boıynsha nátıjeli jumys isteýde. Úkimettik emes uıymdar mınıstrliktiń turǵyndar arasynda ırradıkalızasııa, profılaktıka, semınarlar uıymdastyrý, quqyqtyq jáne dinı saýattylyqty arttyrý jumystaryna kómektesedi. «Aqnıet» uıymy dinı ekstremızm, terrorızm baptarymen sottalǵan azamattardy qoǵamdyq ortaǵa beıimdeý, ońaltý jumystaryn júrgizedi. «Terrorǵa qarsy komıtet» uıymy bolsa, meshittegi jamaǵatqa arnalǵan taktıkalyq jumystarmen aınalysady. «Ýaqyp» qory meshit qyzmetkerlerin qaıta daıyndyqtan ótkizý boıynsha jumys atqarady. Iаǵnı mınıstrlik áleýmetti tolǵandyratyn máselelerdi anyqtap, úkimettik emes uıymdar arasynda memlekettik tapsyryspen jumys júrgizedi. Al olardyń biliktiligi arnaıy komıssııamen anyqtalady. Búgin de biz osy jumystardy odan ári qalaı keńeıtip, jolǵa qoıa alamyz degen maqsatta uıymdar men qor ókilderimen pikir almasyp, talqylaýǵa jınaldyq», dedi sharanyń ashylý barysynda sóz alǵan Qoǵamdyq damý vıse-mınıstri.
Ekstremızm men terrorızmge qarsy turý tek memlekettik organdardyń ǵana emes, tutas qoǵamnyń birlesip atsalysýyn talap etetin ózekti másele. Mınıstrlik azamattyq qoǵammen ashyq suhbatty odan ári tereńdetip, yntymaqtastyqty damyta túspek. Oǵan qosa máselelerdi saýatty aqparattyq súıemeldeýdi jolǵa qoıý kezek kúttirmes másele. Degenmen, qazirgi tańda elimizde dinı ahýal turaqty. Konfessııaaralyq qarym-qatynastar oń jaǵdaıda damyp kele jatyr.
Dindar azamattardyń sanaty arasynda dinı ekstremızm men terrorızmniń aldyn alý ereksheligi týraly sessııa barysynda Qoǵamdyq kelisim komıteti tóraǵasynyń mindetin atqarýshy Balǵabek Myrzaev qoǵamdyq ınstıtýttardyń konfessııaaralyq kelisim men turaqtylyqty saqtaýdaǵy mańyzyna toqtaldy. Al Qazaqstan musylmandary dinı basqarmasy tóraǵasynyń orynbasary, naıb-múftı Baýyrjan Esmahan jat aǵymdardyń aldyn alýda áleýmettik jelilerdiń mańyzdylyǵyna mán berdi.
Konferensııanyń kótergen júginiń salmaqtylyǵy qoǵamnyń nazaryn aýdartady. Azamattarymyzdyń jat aǵymnyń jetegine erip ketpesi úshin, memleket qaýipsizdigin nyǵaıtý maqsatynda Qoǵamdyq damý mınıstrligi azamattyq qoǵam ınstıtýttarymen ózara áreket etý júıesin jasaqtaýdy odan ári jalǵastyra bermek.
Venera TÚGELBAI,
«Egemen Qazaqstan»
ASTANA