Elimizde memlekettik organdardaǵy memlekettik qyzmetshilerge eńbekaqy tóleýdiń jańa júıesin engizilmek. Oralda jýrnalıstermen júzdesken Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl Agenttiginiń BQO boıynsha departamenti basshysy, Ádep jónindegi keńes tóraǵasy Bolat Isaqov reformanyń jáı-japsary týraly keńirek aıtyp berdi.
Laýazymdy jumysty atqarý úshin qajetti bilimi, jaýapkershilik dárejesi men túpki nátıjege baılanysty eńbekti baǵalaý júıesi AQSh, Sıngapýr, Jańa Zelandııa elderinde qoldanylady eken. Bizdiń elimizde 174 jeke jáne kvazımemlekettik kompanııa da óz qyzmetkerlerine dál osy ádis boıynsha jalaqy tólep otyrǵan kórinedi.
Ázirge pılottyq júıe engizilgen memlekettik organdardaǵy memlekettik qyzmetshilerdiń eńbekaqysy 2 esege ósken. Bos orynǵa baıqaýǵa qatysýshy sany da 3 esege kóbeıgen, kadr ketýi 3 ese azaıǵan.
Buryn aımaqtar pen ortalyq memlekettik organdardaǵy memlekettik qyzmetshilerdiń eńbekaqysyndaǵy aıyrmashylyq 70%-ǵa deıin jetse, qazir 10%-ǵa deıin qysqardy.
Elbasy bıylǵy Joldaýynda memlekettik qyzmetshilerge eńbekaqy tóleýdiń pılottyq jańa júıesin júzege asyrýdy tapsyrǵan bolatyn. Reformaǵa pılotty organ retinde Memlekettik qyzmet isteri jáne sybaılas jemqorlyqqa qarsy is-qımyl Agenttigi, Ádilet mınıstrligi, Mańǵystaý jáne Astana qalalarynyń ákimdikteri tańdaldy. Bul jobany daıyndaýdy Agenttik «100 naqty qadam» Ult josparyn júzege asyrý sheńberinde 2015 jyldan bastaǵan eken.
Búginde memlekettik qyzmetker eki parametri – eńbek ótili jáne laýazymyna sáıkes qana jalaqy alady. Biraq atqaryp otyrǵan jumysynyń kúrdeliligi men qyzmetkerdiń tıimdiligi esepke alynbaı, syılyqaqy, ústemaqylar birdeı ólshemde beriledi. Osylaısha ortalyq pen aımaqtaǵy memlekettik qyzmetshilerdiń, sondaı-aq, memlekettik pen jeke sektordyń qyzmetshileriniń eńbekaqysynda tepe-teńsizdik paıda bolǵan.
- Eńbekaqy tóleýdiń jańa júıesi osy kemshilikti joıady. Endi jalaqy faktorly-balldyq shkala negizinde tirkelgen bóliginen jáne bonýstar – aýyspaly bóliginen quralady, - deıdi Bolat Isaqov.
Memleket basshysy Qazaqstan halqyna Joldaýynda vedomstvalyq baǵynysty uıymdardy jekeshelendirý men shoǵyrlandyrýdy jedeldetýdi jáne bosatylǵan qarajatty eńbekaqy tóleýdiń jańa júıesine bıyl engizýdi tapsyrǵan bolatyn.
- Memlekettik organdar basshylary qazirdiń ózinde únemdelgen qarajatty qyzmetkerlerdiń jalaqysyn kóterý úshin paıdalana alady» - deıdi B.Isaqov.
Qazbek QUTTYMURATULY,
«Egemen Qazaqstan»
Batys Qazaqstan