Búgin «Qazmedıa» ortalyǵynda óńirlik BAQ alıansynyń uıymdastyrýymen medıanyń sandyq transformasııasy: naryq, óndiris jáne kontent dıstrıbýsııasy qandaı bolmaq degen taqyrypta BAQ forýmy ótýde.
О́ńirlik BAQ forýmy dep atalatyn búgingi jıyndy Aqparat jáne kommýnıkasııa mınıstri Dáýren Abaev ashty.
«О́ńirlik mass-medıa ókilderiniń basyn qosyp otyrǵan forým Astana Media Week aptalyǵynyń aıasynda ótip jatqany barshańyzǵa belgili. Jýrnalıster úshin, baspasóz qyzmeti men aqparat salasynyń basqa da mamandary úshin kóptegen semınar-trenıngter ótti. Memlekettik múddeni halyqqa jetkizip, qoǵamdaǵy ózgeristerge saı kózqaras qalyptastyrýda aımaqtyq medıanyń mańyzy zor. Osy oraıda qazirgi kúni óńirlik aqparat quraldarynyń aldynda úlken maqsat-mindetter tur. Ol - Memleket basshysynyń tapsyrmasymen júzege asyrylyp jatqan saıası, ekonomıkalyq jáne rýhanı jańǵyrý jónindegi keshendi reformalarǵa jurtshylyqty jumyldyrý», dedi mınıstr.
Medıa aptalyǵynyń uıymdastyrýymen О́ńirlik BAQ forýmy bıyl úshinshi jyl ótip otyr. Atalmysh forýmda jyl saıyn óńirlik aqparat quraldary tarapynan túrli máseleler aıtylyp keledi. Aqparat jáne kommýnıkasııalar mınıstrligi forýmda aıtylǵan usynys-pikirlerdi zerdelep, óńirlik medıa sapasyn arttyrý boıynsha sheshim tabýda. Soǵan sáıkes mınıstrlik qazirgi efırlik-sıfrlyq aqparat, teleradıohabarlardy taratýdy uıymdastyrý jumystaryn júrgizip jatyr.
«Aldaǵy ýaqytta aımaqtyq forým ózara pikir men tájirıbe almasýdyń turaqty alańyna aınalady dep senemin. Aqparat jáne kommýnıkasııalar mınıstrligi óńirlik mass-medıanyń sapasyn arttyratyn kez kelgen bastamany qoldaýǵa ázir», dedi Dáýren Abaev.
Budan soń elimizdiń ár aımaǵynan kelgen qonaqtar «Kontent Market» - kórme hollyndaǵy kovorkıng-aımaǵyn aralady. Sondaı-aq Astana Media Week aptalyǵynyń aıasynda búgin О́ńirlik BAQ alıansy uıymdastyryp jatqan medıanyń sandyq transformasııasy: naryq, óndiris jáne kontent dıstrıbýsııasy qandaı bolmaq degen taqyrypta BAQ forýmy ótip jatyr.
Jıynǵa Aqparat jáne kommýnıkasııalar vıse-mınıstri Nurgúl Maýberlınova, О́ńirlik BAQ alıansynyń prezıdenti Erjan Seıtkazınov, TNS Central Asia bas dırektory Tatıana Starseva, Aiqyn gazetiniń bas redaktory Nurtóre Júsip, Otyrar telearnasynyń basshysy Janara Nurseıtova, Nur.kz aqparat portalynyń Bas dırektory Qýat Bahrıdınov qatysty.
Básekelestik jaǵdaıynda dástúrli BAQ-tyń jeńiske jetýi taqyrybynda Aiqyn gazetiniń bas redaktory Nurtóre Júsip jańa medıa men dástúrli baspasózdi qatar damytý kerek ekenin atap ótti.
«Qazirgi ýaqytta Qazaqstanda 9 mln adam ınternetti qoldanady eken. Kúnine 25-30 myń adam elektrondy úkimet qyzmetine júginedi. Osynyń barlyǵy bizdiń aqparattyq jahandandyrýdyń joǵary qarqynmen júrip jatqanyn kórsetedi. 2002 jyly 1,4 mlrd adam jańalyqty ınternetten oqyp bilse, 2004 jyly onyń sany 3,4 mıllıardqa deıin kóbeıdi. Osyndaı jaǵdaıda bizdiń dástúrli BAQ naryq jaǵdaıyna tótep bere ala ma, ómir súre ala ma, bolashaǵy qalaı bolady degen másele týraly álemde de onyń ishinde Qazaqstanda da kópten beri áńgime bop kele jatyr. О́mir, zaman bir orynda toqtamaıtynyn kórip otyrmyz, jyldam ekenin kórip otyrmyz. Sondaı kezeńde sóz básekesinde qazaq baspasózi jaýapkershilik pen naqtylyqty sezinip, kóptegen jetpeı jatqan nárselerdi jetildire otyryp, jańa medıa men dástúrli baspasózdiń arasyn qustyń qos qanatyndaı birge ustaýymyz kerek», dedi ol.
Marjan TILEÝBEK,
«Egemen Qazaqstan»