«Qazirgi balalar kitap oqymaıdy», «búginginiń balalary gazet-jýrnal qaramaıdy» dep aıtatyn ata-ana kóp, deıdi "Jas órken" seriktestigi dırektorynyń orynbasary Juldyz Ábdilda.
Onyń aıtýynsha, sol ata-analardyń qanshasy balasyna kitap áperip júr? Qanshasy balasyn kitaphanaǵa jetektep bardy eken? Qanshasy arnaıy gazet-jýrnalǵa jazylady? Balalaryna maqsatty túrde gazet-jýrnal jazdyryp berip, ony birge oqıtyn, talqylaıtyn Qazybek Quttymuratuly sekildi ata-ana bizde sırek. Odan góri «balam gadjetterdi shemishkeshe shaǵady» deý abyroılyraq. Osyndaı ýaqytta balalar basylymyn shyǵarý da ońaı emes.
Baıaǵy «Pıoner» men «Qazaqstan pıonerin», búgingi «Aq jelken» men «Ulandy» shyǵaramyz. Búldirshinderge arnalǵan «Baldyrǵanymyz» bar. Búgingi zamannyń balalarynyń talǵamyna saı bolsyn, balalar ózine qajetin tapsyn dep, barymyzdy salamyz, deıdi balalar basylymynyń basshysy.
Qazir eki balanyń biri shetelde oqyǵysy keledi ǵoı, osyny eskerip, damyǵan elderde oqyǵan, oqyp jatqan, jumys istep júrgen jastardy úzbeı jarııalaımyz. Tek qana «Bolashaq» baǵdarlamasymen emes, óz betimen grant ıelenip, bilim alyp jatqan talapty jastardy tanystyramyz. Bir ǵana mysal. Álibek Datbaev degen qazaqtyń jigiti áıgili Booking.com kompanııasynda jumys isteıdi. Osy Álibektiń bir suhbatyn oqyǵan Aman degen bala áıgili kompanııada jumys isteýdi aldyna maqsat etip qoıypty. Osy maqsaty jolynda Álibekke hat jazyp, Álibek oǵan jón siltep, aqyry qujat tapsyrypty. О́kinishke qaraı, birinshi jyly synaqtan óte almapty. Biraq Aman sonda da qaıtpaı, jaqsylap daıyndalyp, bir jyldan keıin qaıta tapsyrypty. Búginde ol – Amsterdam qalasynda ornalasqan Booking.com kompanııasynda jumys isteıtin 15 qazaqtyń bireýi. О́tken nómirlerimizdiń birinde Amannyń suhbatyn jarııaladyq. Amannyń áńgimesi de talaı túlektiń qııalyna qanat bitireri anyq.
Álemdi sharlap, el kezip, jer kórýdi armandamaıtyn bala joq. Sondaı balalar 27 memleketke saıahattaǵan, sonyń 12-sin velosıpedpen sharlaǵan Qýat Bolatovtyń suhbatynan qýat almasyna kim kepil?! Sırek mamandyqtar men olardyń qyr-syry týraly sol mamandyqtardyń ıeleri aıtqan áńgime qyzyqsyz dep kim aıtty? Jasóspirimderdiń áke-sheshesine, ápke-aǵasyna aıtpaıtyn jan syryn bizge jazatyny olarǵa psıhologııalyq qoldaý kórsetýdiń mańyzyn kórsetpeı me? Munyń syrtynda robot jasap, IT tehnologııany meńgergen; bilim jarysynda oza shapqan; qatarynan erek týǵan; talaby taýdaı balalar týraly qanshama materıal jazylyp jatyr. Múmkindigi shekteýli bola tura, tórt múshesi saý adamdardan góri orasan tabysqa jetip júrgenderdiń ómirinen nege úlgi almasqa?!.
Shymkenttegi Nazarbaev zııatkerlik mektebiniń oqýshylary qol kúshimen emes, bilimniń kúshimen sonaý shalǵaıdaǵy Afrıka elderine taza aýyz sý jetkizýge kómektesip júrgenin bilgende tańdanysymyzdy jasyra almadyq. Astanalyq oqýshy qyzdyń qaterli isikke qarsy dári jasap júrgeni; jas ǵalymnyń dıabetterdiń jaǵdaıyn jeńildetip, aptasyna bir ret qabyldaıtyn ınsýlın oılap tapqany; shirıtin polıetılen paket oılap tapqan Erkebulannyń eren eńbegi; múmkindigi shekteýli jandarǵa tegin protez jasap berip júrgen balalar...
Álemdi ózgertetin osyndaı jylt etken dúnıelerdi de qalt jibermeýge tyrysamyz. Sizderdiń de qaperde bolsyn. Al ol úshin, Darhan Qydyráli aǵamyz aıtqandaı, «balalyq shaqtyń qarashańyraǵy ispetti» balalar basylymdaryna nazar sala júrgeısizder. Bizdiń gazet-jýrnaldarymyzǵa bir jyldyq jazylý quny bir asaǵannan qalmaıtyn bir pıssanyń baǵasyndaı-aq. Jyl on eki aı úıińizge kelip turatyn, balańyzǵa baǵyt-baǵdar beretin basylym úshin tym az, deıdi Juldyz Ábdilda.