Qazaqstandyq boksshy Jánibek Álimhanuly Amerıkadaǵy alǵashqy kezdesýin jeńispen aıaqtady.
Kezdesýden keıin pikirimen bólisken Jánibek aldaǵy ýaqyttaǵy kezdesýlerge jaqsylap daıyndalatyn jetkizdi.
«Amerıkadaǵy debıýtti jasap boldym. Bári oıdaǵydaı. Amerıkadaǵy alǵashqy jekpe-jek bolǵannan keıin ónerimdi tolyqtaı kórsetkim keldi. Endi aldaǵy kezdesýge jaqsylap daıyndalý kerek», dedi Jánibek.
Jánibek AQSh-tyń Kalıfornııa shtatyndaǵy Oklend qalasynda kolýmbııalyq Karlos Galvanmen (16-7-1, 15 KO) kezdesti. Tóreshilerdiń sheshimimen jeńis Jánibektiń qanjyǵasyna baılandy. 60:54 upaıyna ıe bolyp, kásipqoı boksta úshinshi ret jeńiske jetti. Al 28 jastaǵy qarsylasy Karlos Galvan karerasynda segizinshi ret jeńilis tapty.
Qazaqstandyq kásipqoı boksshynyń kelesi kezdesýi 3 qarasha kúni AQSh-tyń Tehas shtatyndaǵy El-Paso qalasynda ótedi. Kezekti qarsylasy – amerıkalyq Von Aleksandr. Bul boksshy óziniń qylmystyq ómirbaıanymen tanymal. Von Aleksander qarý kezenip, kisi tonaǵany úshin 11 jyl boıy túrmede otyryp shyqqan.