Elbasy Nursultan Nazarbaev Túrkistan oblysyna sapary barysynda Shymkent qalasyn áleýmettik-ekonomıkalyq damý jónindegi keńeske qatysty.
Jıynda Memleket basshysy Shymkent qalasyn damytý úshin jasalýy tıis jumystarǵa toqtalyp, shahardy órkendetýdiń birneshe baǵytyn atap kórsetti. Ásirese, Shymkentti jańa deńgeıge kóterý úshin týrızm salasyna erekshe den qoıý qajettigin jetkizdi.
«Munda opera jáne balet teatry, dendrobaq, zoobaq, konsert zaldary, teatrlar, mýzeıler jáne taǵy basqa qoǵamdyq oryndar kóp. Mundaı mádenı ortalyqtar kóp jerde joq, al Shymkentte bári bar», dedi N.Nazarbaev.
Elbasy mundaı ortalyqtar shahardyń órkendeı túsýine oń serpin beretinin aıtyp ótti.
Sonymen qatar týrızmdi damytý jol jáne kólik ınfraqurylymdy jaqsartý qajettigin tapsyrdy.
«Týrızm degen sózdi qazaq onsha bile bermeıdi. Qazirgi tańda Qoja Ahmet Iassaýı kesenesine jylyna mıllıonnan astam adam keledi. Álemde týrızm – bıznestiń eń úlken salasy, eń tabysty kózi. Biz de osyǵan umtylýymyz qajet. Qazaqstanǵa kelgisi keletin, kórgisi keletin adam kóp. Osyny eskerip, áýejaı, temir jol vokzaly, avtovokzal sekildi qoǵamdyq kólik joǵary deńgeıge kóterilýi tıis. Shymkent – týrıster úshin tartymdy ortalyqqa aınalýy kerek», dedi Prezıdent.
Memleket basshysy atalǵan mindetterdi oryndaýǵa úkimet te, ákimshilik te kómektesetinin jetkizdi. Byltyr Sochı qalasynda ótken TMD elderi basshylary keńesinde 2020 jyly Shymkent qalasy TMD-nyń mádenı astanasy atanady dep jarııalanǵan bolatyn. N.Nazarbaev osyǵan nazar aýdaryp, daıyndyq jumystaryn pysyqtaýdy tapsyrdy.
Budan keıin О́zbekstanmen shekaralyq forým ótkizýdi josparlaýdy tapsyryp, otandyq taýarlardy kórshi eldiń naryǵyna shyǵarýdyń mańyzdylyǵyna toqtaldy.
«Úkimet pen qala ákimshiligi birlesip, Shymkentte halyqaralyq deńgeıdegi is-sharalardy ótkizý josparlaryn ázirleýdi tapsyramyn. Astana men Almatyda túrli halyqaralyq jıyndar ótip jatyr. Endi Shymkentti de sol qatarǵa qosyp, halyqaralyq is-sharalar ótetin alańǵa aınalýy kerek. Ol úshin tıisti ǵımarattar – konferens zaldar, kongres holl salyný qajet», dedi N.Nazarbaev.
Sondaı-aq Elbasy aýa raıynyń qolaıly bolýy qoıylǵan tapsyrmalardy jedel júzege asyryp, Shymkent qalasyn damytýǵa oń serpin beretinine senim bildirdi.
Abaı ASANKELDIULY,
«Egemen Qazaqstan»
Shymkent qalasy