Myna bir jádiger Qostanaı oblystyq Ybyraı Altynsarın atyndaǵy memorıaldyq mýzeıde saqtaýly tur. Bul qujatta aǵartýshy Altysarınniń ata-tek shejiresi jazylǵan. О́zderińiz kórip otyrǵandaı Jańbyrshydan – Balǵoja bı, odan Altynsary. Osynda aty atalǵan Altynsary atamyz kemeline kelmeı jastaı dúnıeden ótip, onyń artynda qalǵan jalǵyz tuıaq balasy Ybyraıdy atasy Balǵoja tárbıeleıdi.
Memorıaldyq mýzeıdiń ǵylymı qyzmetkeri Shynar Sultanqyzynyń bizge bergen málimetine súıensek, Ybyraı atamyz 1868 jyly Syrdarııa gýbernııasy Perov ýeziniń dáýletti qazaǵy, rýy jappas Sholaq degen kisiniń Aıǵanys atty qyzyna úılenipti. Áıeli kóp jyldan beri bala kótermegen soń ejelgi salt boıynsha inisi Ospannyń Hamıtbek degen balasyn asyrap alady. Onysy tórt jasynda shetineıdi. Sóıtip júrgende 1882 jyly tuńǵyshy Ábdi (Ábdiolla) týady, 1884 jyly ekinshi uly Ábirahmet (Abrahmet), 1886 jyly jalǵyz qyzy Shárıpa dúnıege kelgen. Myna bir jádiger-shejirede osylardyń barlyǵynyń aty atalǵan. Biraq Ábirahmet pen Shárıpa kámelet jasyna tolar-tolmas shaǵynda dúnıeden ótipti.
Altynsarınniń tek Ábdi deıtin balasynan tuıaq jalǵasqan. Onyń aty – Naǵıma Ybyraeva. Iаǵnı, sizder kýá bolyp otyrǵan ata-tek shejireni 1991 jyly mýzeıge ákelip tapsyrǵan osy apamyz. Jaryqtyq bertinde, 1998 jyly 82 jasynda Taraz qalasynda dúnıeden ótipti.
Keńes ókimeti kimdi aıasyn, basqasyn aıtpaǵanda saıasattyń yǵyna jyǵyla júrip, aǵartýshylyq qyzmet etken Ybyraıdyń da urpaǵyn qýǵynnyń astyna alǵan. 1928 jyly Qostanaı jerinde Ábdi atamyzdy kámpeskelep, Qyrǵyzstannyń Toqmaq qalasyna jer aýdarǵan. Jat jerde boıjetken Naǵıma apamyz Baıdabek Amangeldıev degen jigitke turmysqa shyǵyp, Jumagúl jáne Dýlat atty ul men qyz súıgen. 1959 jyly Jambyl oblysy, Moıynqum aýdany Jambyl atyndaǵy sovhozǵa kóship keledi. О́miriniń sońǵy jyldaryn Tarazda ótkizipti. Shejire-jádigerdiń tómengi buryshynda: «Ybyraıqyzy Naǵıma. Meniń aıtýym boıynsha shejire jazylǵan. 1922 jyly» dep tóteshe jazýmen qoltańba qaldyrypty.
Beken QAIRATULY,
«Egemen Qazaqstan»