Búgin elordada Qazaqstan ulttyq quramasyn 6-18 qazan aralyǵynda Argentına astanasy Býenos-Aıreste ótetin III jazǵy jasóspirimder Olımpıadasyna shyǵaryp salý rásimi ótti, dep habarlaıdy UOK baspasóz qyzmeti.
Atalǵan is-sharaǵa Qazaqstan Ulttyq Olımpıadalyq komıteti men QR mádenıet jáne sport Mınıstrliginiń ókilderi, bapkerler men sporttyq delegasııanyń jalpy quramy qatysty. Jasóspirimder Olımpıadasynda Qazaqstan namysyn sporttyń 22 túri boıynsha 57 sportshy qorǵaıdy (tizim qosymshada). Otandyq sportshylar jasóspirimder Olımpıadasyna 41 joldama jeńip aldy. Bıyl jasóspirimder Olımpıadasyna qatysatyn qazaqstandyq sportshylar sany áldeqaıda kóp.
«Sizder sport álemine endi qadam bastyńyzdar. Kópshiligińiz úshin Argentınadaǵy doda ómirlerińizdegi eń iri jarys bolary anyq. Jyldar boıy jattyǵý zalynda tókken terdiń óteýi - namysty qoldan bermeı, álemdik synda abyroımen oralý bolmaq. Sol sebepti, búkil álem tikken dodada Qazaqstan namysyn sizderge senip tapsyrdyq. Jasóspirimder Olımpıadasy sizderdiń bolashaq jeńisterińizge jol bastaıyn doda bolmaq. Bul iri jarystardyń rýhyn sezinýge kómektesedi. Jasóspirimder Olımpıadasy sizderdiń sporttyq ǵumyrlaryńyzdyń irgetasy bolary sózsiz!» dedi Ulttyq Olımpıadalyq komıtetiniń Sport dıreksııasynyń dırektory Elsııar Qanaǵatov.
Jasóspirimder Olımpıadasynyń ashylý saltanatynda Qazaqstan baıraǵyn 18 jastaǵy boksshy Damır Toıbaı alyp shyǵady. Ol bıyl ótken Azııa chempıonatynyń jeńimpazy.
«Biz – ulttyq qurama músheleri, atalǵan oıyndarda álemniń eń myqty atletterimen kúsh synasyp, Qazaqstan halqynyń namysyn qoldan bermeı, jeńiske jetýge, týymyzdy tek bıikte jelbiretýge bar kúsh-jigerimizdi salamyz. Elimizdiń kók baıraǵy maǵan senip tapsyryldy, sondyqtan da bul mártebeniń qanshalyqty jaýapkershilik júkteıtinin sezinemin. О́zime kórsetilgen zor senimdi aqtaýǵa tyrysyp, týymyzdy sporttyq arenanyń bıiginde alyp ótemiz jáne osy halyqaralyq saıysta abyroımen oralamyz dep, ýáde beremin!», dedi Damır Toıbaı.
Bokstan Olımpıada chempıony, búginde olımpıadalyq daıarlaý ortalyǵynda jas sportshylardy tárbıelep otyrǵan Ermahan Ybyraıymov jastarǵa aq jol tiledi.
Qazaqstan UOK ókilderi osy aptanyń basynan beri Argentına astanasynda júr. Olar ulttyq sporttyq delegasııany qarsy alýǵa daıyndalýda. Ashylý saltanaty 6 qazan kúni, tarıhta alǵash ret qala ortalyǵyndaǵy ashyq alańda ótedi. Qalanyń eń kórikti aımaǵy Obelısk mańynda ótetin saltanatty sharany kez-kelgen adamnyń tamashalaýyna múmkindik bar.
Aıta keteıik, III jazǵy jasóspirimder Olımpıadasy 6-18 qazan aralyǵynda Býenos-Aıreste ótedi. Tórtjyldyq dodasyna 206 elden 15-18 jas aralyǵyndaǵy 3926 sportshy qatysady. 32 sport túri boıynsha medaldar jıyntyǵy sarapqa salynady. Olımpıadalyq qozǵalys tarıhynda alǵash ret jasóspirim uldar men qyzdardyń sany teńesti – 1963 adam. Jarys baǵdarlamasyna alǵash ret breık-dans, karate, sporttyq quzǵa órmeleý, roller-sport, jaǵajaı gandboly jáne fýtzal endi.